باڵیۆزخانەی ئەمریکا لە دیمەشق: داوا لە هەموو لایەنەکان لە سووریا دەکەین بگەەنە ڕێککەوتن

پەیامی کورد... باڵیۆزخانەی ئەمریکا لە دیمەشق: داوا لە هەموو لایەنەکان لە سووریا دەکەین بگەەنە ڕێککەوتن

باڵیۆزخانەی ئەمریکا، ڕۆژی پێنجشەممە، داوای لە هەموو لایەنەکان لە سووریا کرد کە بە خێرایی بگەەنە ڕێککەوتنێک سەبارەت بە ڕاگرتنی هەمیشەیی تەقە، و لە نزیکترین کاتدا گفتوگۆکان دەست پێ بکەنەوە بە ئامانجی بەدیهێنانی تێکەڵبوونێکی ئاشتییانە و بەردەوامی باکووری ڕۆژهەڵاتی سووریا لە چوارچێوەی دەوڵەتێکی یەکگرتوو و خاوەن سەروەریدا.

باڵیۆزخانەکە لە بەیاننامەیەکدا کە لە ماڵپەڕی فەرمی خۆی بڵاویکردەوە، پێشوازی لە درێژکردنەوەی ڕاگرتنی تەقە بۆ ماوەی ١٥ ڕۆژ لەنێوان هێزەکانی حکومەتی سووریا و هێزەکانی سووریای دیموکرات (هەسەدە) کرد، وەک ئەوەی لە ٢٤ی کانوونی دووەمدا ڕاگەیەندرا، و داوای لە هەموو لایەنەکان کرد کە بە توندی پابەندی ڕاگرتنی تەقە بن و ئەوپەڕی دانبەخۆداگرتن بنوێنن.

جەختی لە پابەندبوونی هەموو لایەنەکان کردەوە بۆ پاراستنی مەدەنییەکان و ژێرخانی مەدەنی، و پێشوازی لە دروستکردنی ڕێڕەوی مرۆیی کرد بۆ دەستەبەرکردنی گەیاندنی هاوکارییە مرۆییەکان بە شێوەیەکی ئارام و بێ بەربەست. هەروەها جەخت لەسەر پێویستیی پاراستنی ئەم ڕێڕەوانە و دەستپێکردنەوەی خزمەتگوزارییە سەرەتاییەکان لە شاری کۆبانێ دەکاتەوە.

بەیاننامەکە هەروەها پێشوازی لەو ڕۆڵە سەرەکییە کرد کە هاوبەشەکان دەیگێڕن، لەوانە عێراق، حکومەتی هەرێمی کوردستان، حکومەتی سووریا و هێزەکانی سووریای دیموکرات، لە ڕووبەڕووبوونەوەی ئەو تەحەدایانەی ڕێکخراوی داعش دروستیان دەکات.

باڵیۆزخانەکە جەختی لە پێویستیی پاراستنی هەوڵە بەکۆمەڵ و چڕکراوەکان کردەوە لە بەرەنگاربوونەوەی ڕێکخراوی داعش، و داوای لە هەموو لایەنەکان کرد کە دوور بکەونەوە لە هەر بۆشاییەکی ئەمنی لە دەوروبەری ناوەندەکانی دەستبەسەرکردنی ئەندامانی داعش.

لە کۆتاییدا بەیاننامەکە پاڵپشتی خۆی بۆ پرۆسەی گواستنەوەی سیاسیی گشتگیر لە سووریا دووپات کردەوە کە مافی هەموو سوورییەکان بپارێزێت، و جەختی لەوەش کردەوە کە بەدیهێنانی سەقامگیری لە باکووری ڕۆژهەڵاتی سووریا لە ڕێگەی ئامرازە ئاشتییانەکانەوە، ئەولەوییەتێکی سەرەکییە بۆ ڕێگریکردن لە گەڕانەوەی تیرۆر و بەهێزکردنی ئاسایشی ناوچەکە.