داواکاری بەپەلەی ئەنجوومەنی "ژن، ژیان، ئازادی"ی ئاڵمانیا لە نەتەوە یەکگرتووەکان

پەیامی کورد   ...   داواکاری بەپەلەی ئەنجوومەنی "ژن، ژیان، ئازادی"ی ئاڵمانیا لە نەتەوە یەکگرتووەکان

داواکاری بەپەلەی ئەنجوومەنی "ژن، ژیان، ئازادی"ی ئاڵمانیا لە نەتەوە یەکگرتووەکان: ڕەوانەکردنی لیژنەیەكی سەربەخۆ بۆ بەدواداچوونی لە سێدارەدراوەکان و دۆخی زیندانەکانی ئێران

ئەنجوومەنی "ژن، ژیان، ئازادی"ی ئاڵمانیا لە نامەیەکی کراوەدا ڕوو لە ڕیپۆرتەری تایبەتی نەتەوە یەکگرتووەکان، بەرپرسانی مافی مرۆڤی ئەورووپا و بەرپرسی مافی مرۆڤی ئاڵمانیا ، خوازیاری هەوڵی بەپەلەی کۆمەڵگەی نێودەوڵەتی بۆ ڕاگرتنی شەپۆلی لەسێدارەدانەكان و بەدواداچوون بۆ بارودۆخی نامرۆڤانەی زیندانەکانی ئێران بوو.

لەم نامەیەدا بە ئاماژە بە لەسێدارەدانی زیاتر لە ١٣٠٠ کەس لە سەرەتای ساڵی ٢٠٢٥ەوە، ئەم کردەوانەی بە "تاوان دژ بە مرۆڤایەتی" و بەشێک لە سیاسەتی سەرکوتی سیستماتیکی ئێران وەسف کردووە.

ئەنجوومەنەكە بە دەربڕینی نیگەرانی سەبارەت بە لەسێدارەدانی ڕۆژانە و بارودۆخی نامرۆڤانەی زیندان و مانگرتنی بەربڵاوی زیندانییان لە زیاتر لە ٥٢ زیندانی ئێران لەوانە قزڵحەسار، داوای ڕاگرتنی دەست بەجێی لەسێدارەدان، هەڵوەشاندنەوەی سزای لەسێدارەدان، ئازادکردنی زیندانییانی سیاسی و لێپرسینەوەی بەرپرسانی ئێرانی کرد.