ئیلهام ئەحمەد: وەزارەتی بەرگریی سووریا شەڕی کۆمەڵکوژی دژی کورد لە حەلەب ڕادەگەیەنێت

پەیامی کورد- قامیشلۆ... ئیلهام ئەحمەد: وەزارەتی بەرگریی سووریا شەڕی کۆمەڵکوژی دژی کورد لە حەلەب ڕادەگەیەنێت

ئیلهام ئەحمەد، هاوسەرۆکی فەرمانگەی پەیوەندییەکانی دەرەوە لە بەڕێوبەریی خۆسەر، ئەمڕۆ چوارشەممە ڕایگەیاند کە وەزارەتی بەرگری لە حکومەتی ڕاگوزەری سووریا "شەڕ دژی گەڕەکەکانی شێخ مەقسوود و ئەشرەفییە ڕادەگەیەنێت کە پڕن لە خەڵکی سڤیل".

ناوبراو لە پۆستێکدا لە تۆڕی کۆمەڵایەتی (ئێکس) گوتی: "وەزارەتی بەرگری لە حکومەتی کاتیی سووریا شەڕ دژی گەڕەکەکانی شێخ مەقسوود و ئەشرەفییە ڕادەگەیەنێت و شەڕی کۆمەڵکوژی دژی ئەو کوردانە ڕادەگەیەنێت کە پێشتر لەژێر ستەمی ڕژێمی پێشوودا ناڵاندوویانە."

ئاماژەی بەوەش کرد کە "زۆربەی دانیشتووانی گەڕەکەکانی شێخ مەقسوود و ئەشرەفییە ئەو کەسانەن کە بە زۆرەملێ لە عەفرین ئاوارە کراون."

پێشتریش هێزەکانی ئاسایشی ناوخۆ (ئاسایش) لە حەلەب ڕایانگەیاندبوو کە چوار کەس گیانیان لەدەستداوە کە یەکێکیان ئەندامی ئاسایشە، هەروەها ٣٨ کەسی دیکە بریندار بوون (کە شەشیان ئەندامی ئاسایشن)، ئەمەش بەهۆی بۆردوومان و پێکدادانی متمانەپێکراو لەگەڵ هێزەکانی حکومەت لە گەڕەکەکانی ئەشرەفییە و شێخ مەقسوود.

ئەو سیاسییە کوردە گوتیشی: "سەرەڕای پابەندبوونی کورد بە ڕێککەوتنی ١ی نیسان، بەڵام لایەنی بەرامبەر پابەند نەبووە."

ئەحمەد ڕوونی کردەوە: "سەرەڕای پەیوەندییە بەردەوامەکانی ئێمە بۆ ئەنجامدانی گفتوگۆ، بەڵام وەزارەتی بەرگری دیالۆگ ڕەتدەکاتەوە."

هاوسەرۆکی فەرمانگەی پەیوەندییەکانی دەرەوەی بەڕێوبەریی خۆسەر داوای لە دیمەشق کرد بەرپرسیارێتی خۆی بەرامبەر بەوەی ڕوو دەدات هەڵبگرێت، و پەنا بۆ ڕێگەی عەقڵ و لۆژیک ببات بۆ چارەسەرکردنی کێشەکان لە ڕێگەی گفتوگۆوە، و لە شێوازی شەڕ و پێکدادان دوور بکەوێتەوە.

لە کۆتاییدا ئاماژەی بەوە کرد: "ئەو شەڕانەی سوورییەکان چەشتوویانە بەسە؛ داوا لە سوورییەکان و گەنجانی سووریا دەکەین لەم ڕێگایانە دوور بکەونەوە، دەنگی حەق بەرز بکەنەوە و شەڕ ڕەت بکەنەوە."