سەرۆک بارزانی پیرۆزبایی لە یەکیتی ئافرەتانی کوردستان دەکات

پەیامی کورد    ...   سەرۆک بارزانی پیرۆزبایی لە یەکیتی ئافرەتانی کوردستان دەکات

سەرۆک بارزانی، بەبۆنەی یادی ٧٣ ساڵەی دامەزراندنی یەکیتی ئافرەتانی کوردستان پەیامێکی ئاراستەی سکرتێر و ئەندامانی مەکتەبی سکرتاریەتی یەکیتی ئافرەتانی کوردستان کرد و ڕایگەیاند: یەکیتی ئافرەتانی کوردستان ڕۆڵێکی بەرچاو و کاریگەری ھەبووە لە بەرزکردنەوەی ئاستی ھۆشیاری، پاراستنی مافەکانی ئافرەتان، و بەھێزکردنی پێگەی ئافرەتی کورد.

دەقی پەیامی سەرۆک بارزانی:

بەناوی خودای بەخشندە و میھرەبان

بەڕێزان سکرتێر و ئەندامانی مەکتەبی سکرتاریەتی یەکیتی ئافرەتانی کوردستان، بە ‌بۆنەی حەفتا و سێیەمین ساڵیادی دامەزراندنی یەکیتی ئافرەتانی کوردستان پیرۆزبایی گەرم ئاراستەی ئێوە و ھەموو ئەندامانی رێکخراوە تێکۆشەرەکەتان و سەرجەم ئافرەتانی کوردستان دەکەم.

یەکیتی ئافرەتانی کوردستان دەستکەوتێکی گرینگی خەباتی نەتەوەیی و بزووتنەوەی ڕزگاریخوازی کوردستانە کە ڕۆڵێکی بەرچاو و کاریگەری ھەبووە لە بەرزکردنەوەی ئاستی ھۆشیاری، پاراستنی مافەکانی ئافرەتان، و بەھێزکردنی پێگەی ئافرەتی کورد. ئەم ڕێکخراوە بە تێکۆشانی بەردەوامی خۆی توانیویەتی دەنگی ئافرەتانی کوردستان بگەێنێت و بەشێکی گرنگ بێت لە خەباتی نەتەوەیی و مەدەنی گەلی کوردستان.

لەو یادەدا پێزانینم ھەیە بۆ خەبات و قوربانیدانی ئافرەتانی کوردستان و ئەو ئەرکەی کە لە قۆناغەکانی خەباتی گەلی کوردستان لەسەر شانیان بووە. دڵنیام یەکیتی ئافرەتانی کوردستان ھەر وەک قۆناغەکانی پێشووتری خەباتی خۆی، لە داھاتووش دا لە بەرەوپێش بردنی دۆزی ڕەوای گەلەکەمان و بەرگریکردن لە ماف و داخوازییەکانی ئافرەتان ڕۆڵی پێشەنگانە دەگێڕێت.

ھیوای سەرکەوتنتان بۆ دەخوازم

مەسعوەد بارزانی

١١ی کانوونی یەکەمی ٢٠٢٥