ووردەکاری قۆناغێکی نوێی نۆژەنکردنەوەی قەڵای هەولێر لە مانگی مارس بڵاودەکرێتەوە

پەیامی کورد   ...   ووردەکاری قۆناغێکی نوێی نۆژەنکردنەوەی قەڵای هەولێر لە مانگی مارس بڵاودەکرێتەوە

سەرۆکی کۆمیسیۆنی بووژانەوەی قەڵای ھەولێر ڕایدەگەێنێت، لە مانگی ئاداری ئەمساڵ دا و بە فەرمانی سەرۆکی حکوومەتی ھەرێمی کوردستان، قۆناغێکی نوێی نۆژەنکردنەوەی قەڵات دەست پێدەکات کە نیشتەجێ کردنەوەی خێزانەکان و کردنەوەی بەشێک لە شوێنە گشتییەکان لەخۆ دەگرێت.

​د. یادگار محەمەد سەلیم، سەرۆکی کۆمیسیۆنی بووژانەوەی قەڵاتی ھەولێر، لە لێدوانێکی تایبەتدا ڕایگەیاند: "لە ڕێکەوتی ١٠ی ئاداری ٢٠٢٦، پڕۆژەیەکی بەرفراوان بۆ نۆژەنکردنەوەی قەڵای ھەولێر بە ھاوبەشی لەگەڵ ڕێکخراوی یونسکۆ دەست پێدەکات. ئەم پڕۆژەیە چەندین بڕگەی گرینگ لەخۆ دەگرێت، لەوانە:"

​نۆژەنکردنەوەی ڕەفەکانی بەرامبەر دەرگای باشوور و ناوچەی سەرووی چایخانەی مەچکۆ.

​بەردڕێژکردنی چەند ناوچەیەک و نۆژەنکردنەوەی دیوارە داڕماوەکان.

​نۆژەنکردنەوەی ستوونەکانی ناو قەڵات و چەند خانوویەک لە دیوی مافوور فرۆشەکان.

​د. یادگار ئاماژەی بەوە کرد کە ئامانجی سەرەکی حکوومەت بە سیستەم کردنی قەڵاتە پێش کردنەوەی بە ڕووی گشتی دا. سەبارەت بە نیشتەجێ بوون ووتی : "پلانمان ھەیە دوای تەواوبوونی کارەکان، ٥٠ خانەوادە بەپێی میکانیزمێکی تایبەت لە ناو قەڵات نیشتەجێ بکرێنەوە. ئێستا ٤٠ خانوو ئامادەن، بەڵام بۆ کاروباری کارگێڕی و سەنتەرەکان بەکاردێن."

​سەبارەت بە بۆنەکانی نەورۆزی ئەمساڵ، سەرۆکی کۆمیسیۆنی بووژانەوە جەختی کردەوە کە بە ھاوئاھەنگی لەگەڵ پارێزگاری ھەولێر، بەرنامەیەکی تایبەت بۆ ڕازاندنەوە و پیرۆزبایی جەژن لە ناو قەڵات ئامادە دەکرێت، کە ووردەکارییەکانی لە داھاتوویەکی نزیکدا ڕادەگەێندرێت.