سه‌رۆكی ھەرێمی کوردستان، له‌گه‌ڵ باڵیۆزى نوێى كۆریاى باشوور كۆبووه‌وه‌

پەیامی کورد    ...   سه‌رۆكی ھەرێمی کوردستان، له‌گه‌ڵ باڵیۆزى نوێى كۆریاى باشوور كۆبووه‌وه‌

یه‌كشه‌ممه‌ 2025/11/16 نێچیرڤان بارزانى، سه‌رۆكى هه‌رێمى كوردستان، پێشوازی له‌ لى جۆن ئیل، باڵیۆزى نوێى كۆریاى باشوور له‌ عێراق كرد.

له‌ كۆبوونه‌وه‌یه‌كدا‌ سه‌رۆك نێچیرڤان بارزانى پیرۆزبایى له‌ ئیل كرد و هیواى سه‌ركه‌وتنى بۆ خواست، هه‌روه‌ها هه‌موو پشتگیرى و هاوكارییه‌كى هه‌رێمى كوردستانى بۆ سه‌رخستنى ئه‌ركه‌كه‌ى، دووپات كرده‌وه‌.

هه‌ردوولا په‌یوه‌ندییه‌كانى كۆریاى باشووریان له‌گه‌ڵ عێراق و هه‌رێمى كوردستان تاوتوێ كرد و تیشكیان خسته‌ سه‌ر كار و چالاكییه‌كانى كۆمپانیا كۆرییه‌كان له‌ عێراق و هه‌رێمى كوردستان.

سه‌رۆك نێچیرڤان بارزانى، وێڕاى ستایشى په‌یوه‌ندی له‌مێژینه‌ و هاوكارى و یارمه‌تییه‌كانى كۆریاى باشوور بۆ عێراق و هه‌رێمى كوردستان، ئاماژه‌ى به‌ ڕۆڵى ڕێكخراوى كۆیكا كرد كه‌ له‌ كه‌رت و بواره‌ جیاكان دا هاوكاری هه‌رێمى كوردستانى كردووه‌.

له‌ ته‌وه‌رێكى دیكه‌ى كۆبوونه‌وه‌كه‌دا باس له‌ سه‌ركه‌وتنى هه‌ڵبژاردنى ئه‌نجوومه‌نى نوێنه‌رانى عێراق و دۆخى هه‌رێمى كوردستان و ناوچه‌كه‌ به‌گشتى كرا.