وەزارەتی ئاوەدانکردنەوە گرێبەستی تایبەت بە هێڵی شەمەندەفەری واژۆ کرد

پەیامی کورد... وەزارەتی ئاوەدانکردنەوە گرێبەستی تایبەت بە هێڵی شەمەندەفەری واژۆ کرد

وەزارەتی ئاوەدانکردنەوەی حکومەتی هەرێم ئاشکرای کرد، لەگەڵ کۆمپانیایەکی ئیسپانی گرێبەستی تایبەت بە هێڵی شەمەندەفەریان واژۆ کردووە و دواتریش گرێبەستێکی دیکە بۆ ڕاکێشانی واژۆ دەکرێت.

وەزارەتی ئاوەدانکردنەوە لە کۆنفرانسێکی ڕۆژنامەنووسیدا باسی لەوە کردووە، لەگەڵ کۆمپانیایەکی ئیسپانی گرێبەستێکیان بۆ دیاریکردنی سوودی ئابووری و کاریگەری ڕاکێشانی هێڵی شەمەندەفەر لەسەر جموجۆڵ و گواستنەوە واژۆ کردووە.

جەختیان لەوەش کردووەتەوە، دوای تەواوبوونی ئەم گرێبەستە، گرێبەستی دیکە بۆ ڕاکێشانی هێڵەکە کە هێشتا وادەکەی نادیارە واژۆ دەکرێت.

درێژیی هێڵی شەمەندەفەرەکە ٩١٥ کیلۆمەتر دەبێت و قۆناخی یەکەمی لە ئیبراهیم خەلیلەوە ڕادەکێشرێت بۆ پەروێزخان بە درێژایی ٦٠٠ کیلۆمەتر، لە قۆناخی دووەمیشدا هێڵەکە بۆ حاجی ئۆمەران، بەرواری، هەڵەبجە، پێنجوێن و شارەکانی دیکە ڕادەکێشرێت.