هیچ پارێزگایەك ناتوانێ تاكلایەنە بڕیاری كردنەوەی دەرگای مزگەوتەكان بدات

پەیامی کورد    ...    هیچ پارێزگایەك ناتوانێ تاكلایەنە بڕیاری كردنەوەی دەرگای مزگەوتەكان بدات .

ووتەبێژی وەزارەتی ئەوقاف و كاروباری ئایینیی حكوومەتی هەرێمی كوردستان ووتی ،  ناكرێت هیچ پارێزگایەك تاكلایەنە بڕیاری كردنەوەی دەرگای مزگەوتەكان بدات و، پێویستە ئەگەر بڕیار درا سەرجەم مزگەوتەكان پێكەوە بكرێنەوە. دەشڵێ، بڕیارە پێش سەری مانگ، حكوومەت كۆببێتەوە و بڕیار لەو بارەیەوە بدات.

نەبەز ئیسماعیل، ووتەبێژی وەزارەتی ئەوقاف و كاروباری ئایینی حكوومەتی هەرێمی كوردستان  رایگەیاند: "بۆ كردنەوەی مزگەوتەكان پشت بە بڕیاری حكوومەت دەبەستین و كارەكەش بۆ لیژنەی باڵای ڕووبەڕووبوونەوەی نەخۆشیی كۆرۆنا دەگەڕێتەوە، هەروەها ئێمەش پێشنیازی خۆمان داوەتە حكوومەت و ئەوانیش باسیان لەوە كردووە تا سەری مانگ ئەگەر دۆخەكە ئاسایی ببێتەوە، مزگەوت و شوێنە ئایینییەكانی دیكە دەكرێنەوە، بۆیە ناتوانین پێشوەختە بڕیار بدەین و پابەندی بڕیارەكانی حكوومەتین و ناكرێت پارێزگایەك تاكلایەنە بڕیاری كردنەوەی مزگەوتەكان بدات".

ئیسماعیل ووتیشی: "وەزارەتی ئەوقاف زۆر بەپەرۆشە بۆ كردنەوەی دەرگای مزگەوتەكان، بەڵام ئەگەر لەناكاو چەند حاڵەتێك ڕوو بدات، ئەوكات ڕەنگە دۆخەكە گۆڕانكاریی بەسەردا بێت، بۆیە حكوومەت پێش سەری مانگ كۆبوونەوەی خۆی ئەنجام دەدات و ئەوكات بڕیار دەدات، هەر بڕیارێكیش بدات، ئێمە پابەندی بڕیارەكە دەبین، چوونكە سەلامەتیی خەڵك لای ئێمە لە هەموو شتێك گرنگترە و ناكرێت لە مزگەوتێك نەخۆشییەكە بڵاو ببێتەوە، چوونكە دواتر دۆخەكە خراپتر دەبێت، بۆیە هەر بڕیارێك لە بەرژەوەندی خەڵك بێت، ئێمەش پێیەوە پابەند دەبین".