تۆمارکردنی هەزار و 360 ڕووداوی ئاگرکەوتنەوە لە هەولێر

پەیامی کورد...تۆمارکردنی هەزار و 360 ڕووداوی ئاگرکەوتنەوە لە هەولێر

بەڕێوەبەرایەتیی بەرگریی شارستانیی هەولێر ئاماژەی بە ڕووداوەکانی ساڵی ڕابردووی ئاگرکەوتنەوە و خنکانی لە سنووری پارێزگای هەولێر کرد.

سەرکەوت کاڕەش، وتەبێژی بەرگری شارستانیی هەولێر لە کۆنگرەیەکی ڕۆژنامەنووسیدا گوتی: "لە ساڵی ڕابردوودا هەزار و 360 ڕووداوی ئاگرکەوتنەوە تۆمار کراون کە 469 ڕووداویان لەناو شار بوون و 308یان ڕووداوی سووتانی ئۆتۆمبێل و 115 حاڵەت ڕووداوی غاز‌ بووە، هەروەها 644 ڕووداو بەهۆی کارەباوە بوون.

گوتیشی: بەهۆی ڕووداوەکانەوە 38 هاووڵاتی مردوون و 21 هاووڵاتییش خنکاون،  169 هاوڵاتی بریندار بوون و 115 کەسیش ڕزگار کراون.

وتەبێژی بەرگریی شارستانیی هەولێر گوتیشی: لە تەمەنی حکوومەتی هەرێمدا  کابینەی نۆیەم زۆرترین ئۆتۆمبێلی بەرگریی شارستانیی دابین کردووە، تەنها بۆ هەولێر  20 ئۆتۆمبێلی ئاگرکوژێنەوەی گەورەی ستاندەری جیهانی و 50 مێکزمینمان بۆ دابین کراوە کە توانای گەیشتنیان بە شوێنە سەختەکان و ڕێڕەوە تەسکەکان هەیە.