پەیامی کورد   ...   ئەمڕۆ ٢٥ی ئەیلول، حەوتەمین ساڵیادی ڕیفراندۆمی سەربەخۆیی کوردستانە.

ڕیفراندۆمی سەربەخۆیی کوردستان لە ٢٥ی ئەیلوولی ٢٠١٧ بەڕێوەچوو.

خەڵکی هەرێمی کوردستان و قەزا کوردستانییەکانی دەرەوەی ئیدارەی هەرێمی کوردستان بە ڕێژەی 93% پشتیوانی سەربەخۆیی باشووری کوردستانیان کرد.

پرۆسەی ڕیفراندۆم

ڕۆژی 7ی حوزەیرانی 2017 لە شارۆچکەی پیرمام-ی سەر بە هەولێر کۆبوونەوەیەک لەگەڵ لایەنە سیاسییەکانی هەرێمی کوردستان بە سەرپەرشتی سەرۆک بارزانی بەڕێوەچوو.

لەم کۆبوونەوەیەدا ٢٥ی ئەیلوولی ٢٠١٧ وەک وادەی دامەزراندنی ڕیفراندۆمی سەربەخۆیی باشووری کوردستان دیاری کرا.

پارتی دیموکراتی کوردستان (پ.د.ک)، یەکیتی نیشتمانی کوردستان (یەنەکە)، پارتی یەکگرتوویی ئیسلامی کوردستان (یەکگرتوو)، بزووتنەوەی ئیسلامی کوردستان (بیزوتنیو)، پارتی شیوعی کوردستان، پارتی سۆسیالیستی دیموکراتی کوردستان (پەسەدەکە)، پارتی کرێکارانی کوردستان، پارتی کرێکارانی کوردستان ، پارتی گەشەپێدان و چاکسازی کوردستان، لیستی تورکمانی هەولێر، بەرەی تورکمانی عێراقی، پارتی گەشەپێدانی تورکمانی، لیستی ئەرمەنی پەرلەمانی کوردستان، بزووتنەوەی کۆمەڵگەی دیموکراتی ئاشووری و مەجلیسی ئاشووری و کلدان بەشداریان لەم کۆبوونەوەیەدا کرد.

حکوومەتی ناوەندی عێراق و ووڵاتانی دراوسێ دژی بڕیاری ڕیفراندۆم وەستانەوە.

لە لایەکی تریشەوە هەموو کوردانی جیهان پاڵپشتی ڕیفراندۆمی سەربەخۆیی کوردستانیان کرد.

لە پڕۆسەی ڕیفراندۆمدا 400 چاودێری بیانی و 2 هەزار چاودێری ناوخۆیی ئامادەبوون.

هەروەها 159 دەزگای ڕاگەیاندنی بیانی و 500 دەزگای ڕاگەیاندنی ناوخۆیی لە نزیکەوە بەدواداچوونیان بۆ پرۆسەکە کرد.

لە ڕیفراندۆمی سەربەخۆیی هەرێمی کوردستان و قەزاکانی دەرەوەی ئیدارەی هەرێمی کوردستان، پرسیار لە دەنگدەران کرا، "ئایا دەتەوێت قەزاکانی دەرەوەی هەرێمی کوردستان و ئیدارەکەی سەربەخۆ بن؟"

لە ڕیفراندۆمی سەربەخۆیی کوردستان کە لە ٢٥ی ئەیلول بەڕێوەچوو، چوار ملیۆن و ٥٦١ هەزار و ٢٥٥ کەس مافی دەنگدانیان هەبوو.

3 ملیۆن و 305 هەزار و 925 کەس چوونە سەر سندووقەکانی دەنگدان.

لە سەدا ٧٢ی خەڵک بەشدارییان لە ڕیفراندۆمەکەدا کردووە و ٢ ملیۆن و ٨٦١ هەزار و ٤٧١ کەسیش دەنگیان بە "بەڵێ" داوە.

لە ڕیفراندۆمەکەدا لەسەدا ٩٢.٧٣ دەنگیان بە "بەڵێ" داوە.

هەندێک ووڵات بەتایبەت عێراق و تورکیا و ئێران دژی ڕیفراندۆم و ئەنجامەکانی وەستانەوە. ئەمریکا و هەندێک ووڵاتی دیکەش دژایەتیان کرد.

ڕۆژی 15ی تشرینی یەکەمی 2017 ئەندامانی مەکتەبی سیاسی پارتی و ینک بە سەرکردایەتی مەسعوود بارزانی سەرۆکی هەرێمی کوردستان و فوئاد مەعسووم سەرۆک کۆماری عێراق لە قەزای دوکان کۆبوونەوە.

ڕایانگەیاند "هێزە کوردییەکان بە گوێرەی پرەنسیپە دەستوورییەکان و بەرژەوەندییەکانی بەغدا و هەولێر ئامادەن بەبێ مەرج دانووستان بکەن".

گەمارۆی سەر کوردستان

پەرلەمانی عێراق بڕیارێکی دەرکرد و ئەنجامەکانی ڕیفراندۆمی ڕەتکردەوە.

حەیدەر عەبادی سەرۆک وەزیرانی عێراق لەو کاتەدا داوای کردبوو "عێراق هەموو ڕێوشوێنێکی پێویست بگرێتەبەر بۆ پاراستنی یەکپارچەیی خاکەکەی و بەرەنگاربوونەوەی بزووتنەوە جوداخوازییەکان".

ڕۆژی 14ی ئەیلول، ئیدارەی بەغدا نەجمەدین کەریم پارێزگاری کەرکوکی لە کارەکەی دوورخستەوە، کە پاڵپشتی ڕیفراندۆمی کردبوو.

دوای گفتوگۆکانی نێوان بەغدا و ئەنقەرە و تاران، مەترسی گەمارۆی ئابووری و گەمارۆکان لە هەرێمی کوردستان بەرزکرایەوە.

ئەنقەرە بەهۆی هەرێمی کوردستانەوە ئاسمانی خۆی داخست و گەشتە ئاسمانییەکانی بۆ فڕۆکەخانەکانی هەولێر و سلێمانی قەدەغە کرد.

لە لایەکی دیکەوە ئێران دەروازە سنوورییەکانی لەگەڵ هەرێمی کوردستان داخست.

ڕۆژی 16ی تشرینی یەکەمی 2017 لەگەڵ کشانەوەی بەشێک لە یەکەکانی یەکیتی نیشتمانی کوردستان (یەنەکە)، سوپای عێراق و حەشدەی شەعبی چوونە قەزاکانی کوردستان، بە پلەی یەکەم بۆ کەرکوک و خورماتوو.

دوای ئەوەی ئەو هێزانە ڕوویان لە کەرکوک و ناوچەکانی دیکەی کوردستان کرد، ئەو بنەماڵە تورکمان و عەرەبانەی کە پاڵپشتی ڕیفراندۆمیان دەکرد، هەروەها دەیان هەزار کورد ناچاربوون ماڵ و حاڵی خۆیان بەجێبهێڵن.

دەستکەوتی دیپلۆماسی

سەرۆکی حکوومەتی هەرێمی کوردستان لەو کاتەدا نێچیرڤان بارزانی و شاندەکەی لە مانگی کانوونی دووەمی ٢٠١٧ لەسەر بانگهێشتی فەڕەنسا چوونە پاریس.

نێچیرڤان بارزانی لە کۆشکی ئەلیزە لەگەڵ ئێمانۆئێل ماکرۆن، سەرۆکی فەڕەنسا کۆبووەوە.

دوای ڕووداوەکانی 16ی ئۆکتۆبەر، فەڕەنسا پاڵپشتی دیپلۆماسی لە هەرێمی کوردستان کرد.

فەڕەنسا داوای لە بەغدا کرد مافە دەستوورییەکانی هەرێمی کوردستان ببەخشێت.

ماکرۆن بوو بە ناوبژیوان بۆ ئاسایی کردنەوەی پەیوەندییەکانی نێوان هەولێر و بەغدا.

نێچیرڤان بارزانی، سەرۆکی حکوومەتی ئەو سەردەمە، شەڕی ناوخۆی ڕاگرت کە لە ئەنجامی دیپلۆماسیەتیەکەیدا کارەساتێکی گەورەی مرۆیی لە عێراقدا درووست دەبوو.

ئەم بابەتە 49920 جار خوێندراوەتەوە