پەیامی کورد   ...   ئەگەری دەستپێكردنی دانووستانی ناڕاستەوخۆی نێوان کۆماری ئیسلامی و ئەمریکا لە عومان لە حەفتەكانی داهاتوودا

ڕۆژنامەنووسی ئەمریکی لۆرا رووزن بە پشت بەستن بە سەرچاوەیەکی ئێرانی ڕایگەیاند کە ئەگەر ئەمریکا ڕازی بێت بە ئەنجامدانی دانووستانی ناڕاستەوخۆ لەگەڵ کۆماری ئیسلامی، ئەوا دەکرێت لە ماوەی دوو بۆ سێ هەفتەی داهاتوودا ئەم وتووێژانە لە عوممان بەڕێوە بچێت.

ئەو سەرچاوەیە کە ناسنامەکەی ئاشکرا نەکراوە، ئاماژەی بەوەش کردووە، ئەگەر ڕێککەوتنی سەرەتایی لەسەر چوارچێوەی دانووستانەکان بکرێت، ئەوا ئەگەری ئەنجامدانی گفتوگۆی ڕاستەوخۆش لەبەرچاو دەگیرێت.

بەپێی ئەم سەرچاوەیە، خولی یەکەمی ئەم دانووستانانە بە نهێنی و بەبێ ئاگادارکردنەوەی گشتی بەڕێوەدەچێت.

ڕاپۆرتەکان ئاماژە بەوە دەکەن کە تیمی دانووستانکاری ئەگەری کۆماری ئیسلامی بریتی دەبێت لە مەجید تەخت ڕەوانچی، جێگری وەزیری دەرەوە بۆ کاروباری سیاسی و کەسی سەرەکی لە دانووستانەکانی ساڵی ٢٠١٥ و کازم غەریب ئابادی، جێگری وەزارەتی دەرەوە بۆ کاروباری یاسایی.

تا ئێستا هیچ ووڵامێکی فەرمی لە لایەن ئەمریکاوە بڵاونەکراوەتەوە.