پەیامی کورد   ...   تاڵیبان : پێویستە پەیوەندییەکان لەگەڵ ئێران زیاتر پتەوتر بکرێن

جێگری ئیداری سەرۆکوەزیرانی حکوومەتی تاڵیبان، لە دیدارێکدا لەگەڵ باڵیۆزی شاندی دەسەڵاتداری ئەفغانستان لە تاران، خوازیاری پتەوکردنی زیاتری پەیوەندییەکانی لەگەڵ ئێران بوو.

فازڵ محەممەد حەقانی، بەرپرسی باڵیۆزخانەی حکوومەتی تاڵیبان بە وەکالەت لە تاران، لە دیدارێکدا لەگەڵ عەبدۆلسەلام حەنەفی، جێگری سەرۆکوەزیرانی ئیداری دەستەی دەسەڵاتداری ئەفغانستان، سەبارەت بە ئەرک و چالاکییەکانی خۆی ڕاگەیاند.
هەروەها ناوبراو زیادی کرد : بەرپرسانی ئەم باڵیۆزخانەیە کار بۆ فراوانکردنی پەیوەندییەکانی نێوان ئەفغانستان و ئێران لە بوارە جیاجیاکان دەکەن، کە ئەنجامێکی باشی لێکەوتووەتەوە.
حەقانی جەختی لەوە کردەوە: بە سەرنجدان بەوەی کە ژمارەیەکی زۆر لە هاووڵاتیانی ئەفغانی لە ئێران ئامادەن، خزمەتگوزاری کونسووڵگەری لەم باڵیۆزخانەیە چالاکە و هاووڵاتیانی ئەفغانی نیشتەجێی ئەم ووڵاتە خزمەتگوزاری باشیان بۆ دابین دەکرێت و کێشەکانیان چارەسەر دەکرێت.
هەروەها حەنەفی لەم دیدارەدا ڕایگەیاند کە ئەفغانستان و ئێران پەیوەندییەکی ئایینی، مێژوویی، کولتووری و ئابووری لەمێژینەیان هەیە و پێویستە بەرپرسانی باڵیۆزخانەکە کار بۆ بەهێزکردنی زیاتریان بکەن.