پەیامی کورد   ...   زیاتر لە ٢٠٠ چالاکی مەدەنی و سیاسی  پاڵپشتی خۆیان بۆ ووریشە مورادی دەربڕی 

زیاتر لە ٢٠٠ چالاکی مەدەنی و سیاسی بە بڵاوكردنەوەی بەیاننامەیەک، پاڵپشتی خۆیان بۆ ووریشە مورادی دەربڕی و حوکمی لەسێدارەدانیان بە "کوشتنی بەئەنقەستی حكوومەتی" ناوبرد و داوای پشتیوانییان لە هەموو لایەك بۆ هەڵوەشاندنەوەی سزای لەسێدارەدان كرد.

واژووکارانی ئەم بەیاننامەیە، بە ئاماژەدان بە دەرکردنی حوکمی لەسێدارەدان بۆ ووریشە مورادی و ئەگەری پشتڕاستکردنەوەی ئەم حوکمە لەلایەن دادگای باڵا و جێبەجێکردنی، وێڕای شەرمەزارکردنی هەر لەسێدارەدانێک، ڕایانگەیاند: "ئێمە پێمان وایە لەسێدارەدان لە هەر هەلومەرجێکدا کوشتنێکی بەئەنقەستی حكوومەتییە".

ئەوان دەركردنی ئەو حوکمەیان بۆ ووریشە مورادی بە حوکمێک لە دژی هەموو ژنانی کۆمەڵگە و کوردستان زانی و ڕایانگەیاند کە لە ماوەی ١٠٠ ساڵی ڕابردوودا ژنان "پێشڕەوی خەبات بە کاردانەوە و فاشیزم بوون و قوربانی بەردەوامی حوكمڕانان بوون".

واژووكارانی ئەم بەیاننامەیە هەروەها ئیدانەی سزای لەسێدارەدانی پەخشان عەزیزی و شەریفە محەمەدی و زیاتر لە ٥٠ زیندانی سیاسی و عەقیدەتی و هەزاران زیندانی بە تاوانی مادەی هۆشبەر کرد.