سەرۆك بارزانی پێشوازی لە باڵیۆزی بەریتانیا لە عێراق کرد
پەیامی کورد ... سەرۆك بارزانی پێشوازی لە باڵیۆزی بەریتانیا لە عێراق کرد
ڕۆژی چوارشەممە 6ی تشرینی دووەمی 2024 لە سەلاحەددین سەرۆك مەسعوود بارزانی پێشوازی لە ستیڤن هیتچن باڵیۆزی بەریتانیا لە عێراق كرد.
لە دیدارەكەدا كە ئاندرو بیزلی كونسووڵی بەریتانیا لەهەولێریش ئامادەی بوو، باڵیۆزی بەریتانیا لە عێراق پیرۆزبایی سەركەوتنی هەڵبژاردنی ئۆكتۆبەری ڕابردووی پەرلەمانی كوردستان و ڕێژەی بەرزی بەشداری خەڵك لە دەنگدان و بەڕێوەچوونی لە كەشێكی ئارامدا لە سەرۆك بارزانی كرد. لای خۆیەوە سەرۆك بارزانی سوپاسی گەلی كوردستانی كرد كە بەم ڕێژە بەرزە بەشداری هەڵبژاردنیان كردووە.
دانووساندنەكانی پەیوەست بە پێكهاتە و ئەجێندای حكوومەتی داهاتووی هەرێمی كوردستان تەوەری تری ئەو دیدارە بوو و سەرۆك بارزانی جەختی لەوە كردەوە كە پارتی بۆ پێكهێنانی حكوومەت ڤیتۆی لەسەر كەس نیە و پێویستە گفتوگۆكان لە چوارچێوەی یەك هەرێم و یەك پەرلەمان و یەك حكوومەت و یەك هێزی پێشمەرگەدا بێت.
هەر لەو دیدارەدا بیروڕا لەبارەی دەرئەنجامەكانی هەڵبژاردنەكانی ئەمەریكا و كاریگەری لەسەر هاوكێشەكانی جیهان و ناوچەكە و هەروەها بارودۆخی سیاسی عێراق و هەڵبژاردنی سەرۆكی ئەنجوومەنی نوێنەرانی عێراق ئاڵوگۆڕ كرا.
ئەم بابەتە 27 جار خوێندراوەتەوە