سەرۆك بارزانی پێشوازی لە شاندێكی باڵای هوداپار کرد
پەیامی کورد ... سەرۆك بارزانی پێشوازی لە شاندێكی باڵای هوداپار کرد
ڕۆژی چوارشەممە 3ی ئەیلوولی 2024 لە سەلاحەددین سەرۆك مەسعوود بارزانی پێشوازی لە شاندێكی باڵای هوداپار بە سەرۆكایەتی زەكەریا یاپیجیئۆغلوو، سەرۆكی گشتی هوداپار كرد.
لەدیدارەكەدا بارودۆخی سیاسی ناوچەكە و دواپێشهاتەكان خرایە بەرباس و گفتوگۆ، هەورەها ڕۆشنایی خرایە سەر خەباتی سڤیل بۆ خزمەتكردنی گەلانی توركیا و پەیوەندییەكانی نێوان پارتی دیموكراتی كوردستان و هوداپار و جەخت لە پەرەپێدانی ئەوە پەیوەندییانە كرایەوە.
هەر لەو دیدارەدا سەرۆكی گشتی هوداپار پێزانینی بۆ ڕۆڵی سەرۆك بارزانی لە پێشخستنی دۆزی گەلی كورد هەبوو و خۆشحاڵیی خۆشی بۆ بوونی هەماهەنگی و پەیوەندی نێوان هوداپار و پارتی دیموكراتی كوردستان خستەڕوو.
لە بەشێكی تری ئەو دیدارەدا سەرۆك بارزانی وێڕای ئاماژەدان بە مێژووی خەباتی گەلی كوردستان، ئەوەی بە شاندی میوان ڕاگەیاند كە باشترین ڕێگە بۆ چارەسەری پرسی كوردستان، شێوازی لێك تێگەیشتن و یەكترقبووڵكردن و دیالۆگ و چارەسەری ئاشتیانەیە.
ئەم بابەتە 79981 جار خوێندراوەتەوە