پەیامی کورد   ...   سەرۆکی حکوومەت ساڵیادی دامەزراندنی هەردوو حزبی شیووعی عێراق و کوردستان پیرۆز کرد

 سەرۆکی حکوومەتی هەرێمی کوردستان، ساڵیادی دامەزراندن لە هەردوو حزبی شیووعی عێراق و کوردستان پیرۆز دەکات و دەڵێت، مێژوویەکی دێرینیان لە تێکۆشان لە پێناو ئازادیدا هەبووە. 

دووشەممە، 31-03-2025، مەسروور بارزانی، سەرۆکی حکوومەتی هەرێمی کوردستان، لە پەیامێکدا بە بۆنەی (91)مین ساڵیادی دامەرزاندنی هەردوو حزبی شیووعی عێراق و کوردستان، "گەرمترین پیرۆزبایی ئاراستەی سکرتێر و ئەندامانی کۆمیتەی ناوەندی و گشت ئەندام و لایەنگرانی هەردوو حزبە تێکۆشەرەکە" کرد .

بە ووتەی سەرۆکی حکوومەتی هەرێمی کوردستان، مەسروور بارزانی "حزبی شیووعی عێراق و حزبی شیووعی کوردستان، مێژوویەکی دێرینیان لە تێکۆشان لە پێناو ئازادی و داکۆکیکردن لە ماف و داخوازییە ڕەواکانی گەلانی عێراق و بە تایبەتی گەلی کوردستاندا هەیە ."

لە بەشێکی دیکەی پەیامەکەی سەرۆکی حکوومەتدا هاتووە، "ئومێدی سەرکەوتنیان لە خەبات و تێکۆشانیان لە پێناو بەرگریکردن لە مافە ڕەواکانی گەلی کوردستان و بەهێزکردنی بنەماکانی ئازادی و دیموکراسی لە عێراقدا بۆ دەخوازم."