پەیامی کورد   ...   سەرۆکی سەندیکای پزیشکان : سوپاسی مەسروور بارزانی دەکەین هەموو کات هاوکاری و پاڵپشتی کردووین

 پێنجشەممە، ٣١ـی ئۆکتۆبەری ٢٠٢٤، د. باساک بەرزنجی، سەرۆکی کۆنگرە و سەرۆکی سەندیکای پزیشکان، لە ١٠یەمین کۆنگرەی پزیشکی مێزۆپۆتامیا ڕایگەیاند، ئامادەبوونی سەرۆک بارزانی ورەمان پێدەدات، کە بەردەوام بین و دەست لە ئاواتەکانمان ھەڵ نەگرین.

سەرۆکی کۆنگرەکە دەڵێت: "سوپاسی مەسروور بارزانی دەکەین کە ھەموو کات لەگەڵمان دایە و ھاوکاری و پاڵپشتی کردووین بۆ ئەم کۆنگرەیە".

د. باساک بەرزنجی دەشڵێت: "ئەمڕۆ پزیشکان لە تاراوگە و شارە جیاوازەکان لێرە کۆبوونەتەوە، کە زۆربەمان لە زۆر کۆنگرە و ووڵاتانی جیاواز بەشدار بووین، بەڵام کۆنگرەی ئەمڕۆ جیاواز و تایبەتە".

باساک بەرزنجی باسی لەوەش کرد: "ئەمڕۆ ئێمە وەک پزیشکی کورد دڵمان خۆشە، دڵنیام سەرۆک بارزانیش لە ئێمە دڵخۆشترە، کە دەبینێت ھەموو پزیشکان لێرە کۆبوونەتەوە، تا لە ئاستی بەرزی زانستی ئەوەی لە توانایان دایە پێشکەشی کوردستان و گەلەکەی بکەن".

ناوبراو ڕاشیگەیاند: "ئەمڕۆ ١٠یەمین کۆنگرەی پزیشکانی مێزۆپۆتامیایە، یەکەم جارە لە ھەولێر ساز دەکرێت، مەبەست لەم کۆنگرانە ئەوەیە کە ئەو پزیشکانەی لە بابەتی خۆیان گەیشتوونەتە ئاستێکی بەرز، گۆڕینەوەی ڕای زانستی پزیشکان و ھاوکارییی یەکتری لەگەڵ دانانی بناغەی زمانی کوردی لە بواری پزیشکیی، پێشکەش بکرێت".