پەیامی کورد   ...   سەرۆکی هەرێمی کوردستان پیرۆزبایى له‌ كرێكاران دەکات

سەرۆکی هەرێمی کوردستان بەبۆنەی رۆژی جیهانی کرێکاران پەیامێکی بڵاوکردەوە و دەڵێت، "جەخت لە پشتگیری تەواوی مافەکانی کرێکاران و داوا رەواکانیان دەکەینەوە".

دەقی پەیامی سەرۆکی هەرێمی کوردستان.

بە بۆنەی یەکی ئایار، جەژنی جیھانی کرێکارانەوە، گەرمترین پیرۆزبایی پێشکەش بە ھەموو کرێکارانی کوردستان، عێراق و جیھان و ڕێکخراوەکانیان دەکەم. ڕەنج و کۆشش و ماندووبوونیان لە بونیاتنان و ئاوەدانکردنەوە و بەشداری کارا و بنەڕەتییان لە پێشخستن و گەشەسەندنی ووڵاتدا، بەرز دەنرخێنم.

جەخت لەسەر پشتگیری تەواوی مافەکانی کرێکاران و داوا ڕەواکانیان لە ھەرێمی کوردستان دەکەینەوە، ھەروەھا پێداگری لەسەر پێویستی دابینکردنی ژینگەیەکی کاری ئارام و بەدیھێنانی دادپەروەری لە ھەلەکانی کار و ڕێکخستنی پەیوەندی نێوان کرێکاران و خاوەنکاران دەکەین لەسەر بنەمایەک کە شکۆی کرێکار بپارێزێت و دڵنیایی گوزەران و ژیانیان، مسۆگەر بکات.

ھەر بەم بۆنەیەوە، بە ڕێزەوە ھەموو ئەو کرێکارانە بەبیردەھێنینەوە کە لە کاتی کاردا گیانیان لەدەست داوە و سڵاو لە خێزان و کەسوکاریان دەکەین. جەخت دەکەینەوە کە لایەنە پەیوەندیدارەکان دەبێ چاودێری خێزانەکانیان بکەن و ھەموو پشتیوانی و ھاوکارییەکی پێویستیان بۆ فەراھەم بکرێت.

ھیوای پشوویەکی ئارام و ئاسوودە بۆ ھەموو کرێکاران و سەرکەوتن لە ھەوڵ و خەباتیان بۆ دەستەبەرکردنی مافەکانیان دەخوازم.