سەرۆکی ھەرێمی کوردستان : پرۆسه‌ی یه‌کخستنی پێشمه‌رگه سه‌رده‌خه‌ین
پەیامی کورد ... سەرۆکی ھەرێمی کوردستان : پرۆسه‌ی یه‌کخستنی پێشمه‌رگه سه‌رده‌خه‌ین
سەرلەبەیانی پێنجشەممە ١٧-١٠-٢٠٢٤، نێچیرڤان بارزانی، سەرۆکی ھەرێمی کوردستان، بەشداری لە ڕێوڕەسمی ٢٩یەمین خولی دەرچووانی پێگەیاندنی کۆلێژی سەربازی دووی زاخۆ کرد کە ژمارەیەک لە بەرپرسانی حکوومەتی ھەرێمی کوردستان و حزب و لایەنەکان و فەرماندە و ئەفسەر و مامۆستایانی کۆلێژی سەربازی و کەس و کاری قوتابیان تێیدا ئامادە بوون.
لە ڕێوڕەسمەکەدا دوای نمایشی سەربازی دەرچووان، نێچیرڤان بارزانی ووتەیەکی پێشکەش کرد، ئەمە دەقەکەیەتی:
دەرچوویێت خۆشتڤی،
ئامادەبوویێت ھێژا،
ڕۆژ باش.. ھوین ھەمی گەلەک ب خێر ھاتن سەرچاڤا..
گەلەک خۆشحالم کو دگەل ھەوەیێن ڕێزدار، بەشدارییا دەرچوونا خولا (٢٩)ێ یا پێگەھاندنا کۆلێژا سەربازی یا دو یا زاخۆ دکەم. ئەڤ دیمەنە بۆ مە و بۆ ھەمی خەلکێ کوردستانێ، جھێ شانازیێیە کو (٧٩٢) ئەفسەرێت مە یێت گەنج، خویندنا خۆ یا سەربازی، یا ئەکادیمی و پراکتیکی بدویماھی تینن.
جھێ دەستخۆشی و سەربلندییەکا مەزنە، پشتی کو ھەوە خویندنا خۆیا زانکۆیی بدویماھی ئینای، ھوین ب خواست و ڤیانا خۆ ھاتی، داکو خویندنا سەربازی ژی بدویماھی بینن و ببنە ئەفسەرێت پێشمەرگەی. ئەڤ ناڤ نیشانێ حەزکرن و دلسۆزییا ھەوە بۆ خزمەتێ و بۆ کوردستانێ نیشا ددەت. ھەر بژین، ھەر سەرکەفتی بن.
یا زێدە جھێ خۆشحالیێ، دناڤ ڤان دەرچوویادا، (٥٠) کچێت کوردستانێ، (١٣) ئێزدی و دەرچوویەکێ کاکەیی ھەنە. ئەڤە دلخۆشییەکا مە ھەمیانە. ب گەرمی و ب دل پیرۆزباھیێ ل ھەوە ھەمیا دکەم، ل مالبات و کەسوکارێت ھەوە دکەم کو ئەڤرۆ د ڤێ مەراسیمێدا دگەل مە بەشدارن، پیرۆز بیت ل وان، پیرۆز بیت ل ھەوە، ھیڤییا سەرکەفتنێ بۆ وە دخوازم.
ئەز ژی دگەل مالباتێت ھەوە ئەڤرۆ ڤێ ئاھەنگێ دگێڕین و پر ب دل شانازیێ ب وە دکەم، ئەو شانازییا کو مالباتێت وە ب ھەوە دکەن، ئەز ژی ل جھێ خۆ شانازیێ ب ھنگۆ دکەم و ب ئانەھییا خودێ ھەر سەرکەفتی و سەرفەراز بن و د ژیانا خۆ دا.
من دڤێت ئەز تشتەکێ ژی ببێژم، دناڤ مەدا ئەڤرۆ کەسەک ئامادەیە کو وەکی باب یێ بەشدارە د ڤێ مەراسیمێدا، ئەو ژی فەرماندەیەکێ مە بوو کو خزمەتەکا مەزن یا کوردستانێ کر و مخابن ل شەڕێ ئازادییا عێراقێ بریندار بوو، ئەم ھەمی پێکڤە بە چەپلەیەکی بخێرھاتنێ ب وەجی بارزانی دکەین کو دگەل مە یێ بەشدارە.
ئەز ژی وەکی مالبات چەوا مالباتا وە ئەڤرۆ لێرە د ئامادەنە ئێک ب ئێک یێت ھنگۆ شانازیێ ب ھنگۆ دکەن، ئەز ژی وەکی مالبات دێ بێژمێ، مام ئەم شانازیێ ب تە دکەین چونکی ئێک ل وان قوتابیی یێت دەرچوو ئەڤرۆ لێرە ھەی کوڕێ وی یە و کوڕێ خۆ یێ پەروەردە کری و یێ فێر کری کو ئەو ژی لسەر ڤێ ڕێکێ یێ بەردەوام بیت، ئەو ڕێکا کو بابێ وی گرتی و تێدا بۆ ئازادییا عێراقێ و سەرفەرازییا مللەتێ مە بریندار بووی، کوڕێ خۆ ژی یێ پەروەردە کری کو لسەر وێ ڕێکێ یێ بەردەوام بیت، ھنگ ھەمی ڤێکڕا تەمەندرێژ و سەرفەرزان و سەرکەفتی بن و مامێ وەجی تو ژی گەلەک بخێرھاتی سەرچاڤا و سەر سەرا و یێ پشتڕاست بە کو ماندیبوونا تە بۆ خزمەتا لەشکرێ کوردستانێ، ئەو ماندیبوونا تە کری ھەمی گاڤا وەکی بەرپەڕەکێ زێڕین دێ ل خەباتا پێشمەرگایەتیێ و کوردستانێ ھێتە نڤێسین و ئەم ھەمی شانازیێ ب تە دکەین و ھیڤیا سەرکەفتنێ بۆ ھەوە ھەمیا دخوازم. ھیڤیدارم جارا بھێت ژمارا ئافرەتا د ڤان خولادا زێدەتر ببیت.
گەلی دەرچوویێت ھێژا،
ژ ڕۆژا کو ھەیە و ھەتا ئەڤرۆ، پێشمەرگایەتی جھێ شانازی و شەرەفمەندیێ و بەرپرسیاریەتییەکا مەزن بوویە. ژ ڕۆژا کو ناڤێ پێشمەرگەی ھەیە و ھەتا ئەڤرۆ، باوەرییا کورد و کوردستانێ بخۆ، ب دۆزا خۆ و ب مافێت خۆ یێت ڕەوا، ھەر موکوم و ڕۆژ ب ڕۆژ ژی موکومتر کریە.
پێشمەرگایەتی، ئەرکەکێ گەلەکێ پیرۆزە، بەشەکێ گرنگ یێ ناسناما نیشتمانی و یا نەتەوەیی یا کوردستانێ یە. بەردەوامییا کاروانەکێ دویر و درێژێ خەبات و تێکۆشینێیە بۆ پاراستنا مللەتێ مە، بۆ پاراستنا کوردستانییا. ژبەر ھندێ ژی، دەرچوونا ھەوە یا ئەڤرۆ، سەرکەفتن و بدویماھی ئینانا خویندنێ، دویماھیا ڕێکێ نییە.
نەخێر،
ئەڤرۆ، ئەو تشتێ ئەڤرۆ ھنگ دەسپێدکەن، خزمەت و ئەرکێ ھەوە یێ نوییە دگەل دامودەزگەھێت حکوومەتێ بۆ کوردستانێ. ئەڤ ئەرکە بۆ ھەوە و بۆ مە ھەمییا شانازییەکا مەزنە. ھەیاما (٩) ھەیڤێت چوویی یێت مەشق و ڕاھێنان و فێربوونێ، ھەوە ئەزموونەکا دەوڵەمەند وەرگرت، داکو ئەڤرۆ بشێن خزمەتا وەلاتێ خۆ بکەن.
باوەڕ‌ناما ھەوە، ھەر بتنێ دەسکەفتەکێ ئەکادیمی نییە، پەیمانا شەرەفمەندیێ و سیمبۆلا دلسۆزیێ و وەفاداریێ و ئەمانەتەکێ مەزنە بۆ خزمەتا مللەتێ خۆ و بۆ خزمەتا وەلاتێ خۆ. نیشانێ ئامادەیی و حازرییا ھەوەیە بۆ ھەر قوربانیدانەکێ د ڕێکا وەلاتیدا.
د دیرۆکا بزاڤا ڕزگاریخازا گەلێ کوردستانێدا، پێشمەرگەی قوربانی یێت گەلەک مەزن دانە. ب ھێزا پێشمەرگا، ڕوحا خۆڕاگری، خوینا خۆ دایە و ڕوحا بەرخۆدانێ بەرجەستە کرییە، داکو ھەمی جارا بەرەڤانیێ ل ئاخا کوردستانێ، ل دۆزا مللەتێ خۆ بکەن. ھەمی دیرۆکا پێشمەرگاتیێ قەھرەمانی و مێرخاسی و قوربانیدانێت مەزن بۆ ئازادیێ و بۆ شکۆمەندییا کوردستانێ، سەرێ خۆ یێ دانای، بەلێ ھیچ وەختەکی خۆ بۆ دوژمنی نەچەماندییە.
ڤێ دویماھیێ کو مەزنترین ڕێکخراوا تیرۆریستی ل جیھانێ ب سەر عێراقێ و کوردستانێدا گرتی، پێشمەرگە بوو ل بەرۆکێت شەڕی، ب گیانێ خۆ و خەباتا خۆ، ئەفسانەیا داعشێ تێکشکاندی. ڕێ نەدا کوردستان بکەڤیتە دەستێ تیرۆرستا. لەوما، ھندی کورد و کوردستان ھەبن، پێشمەرگە دێ ھەر مینیت ئیلھامبەخش و پارێزڤانێ گەلێ کوردستانێ و دێ مینیت سیمبۆلا خۆڕاگری و بەرخودانێ. لێرەدا ئەم بەژنا خۆ دچەمینین بۆ خوینا وان شەھیدا، ئەوێت کو د ڤێ ڕێکێدا خەبات کری و گیانێ خۆ کرییە قوربانی.
د ڤێ ھەلکەفتنێدا، من دڤێت جارەکا دی، سوپاس و پێزانینێت ھەرێما کوردستانێ بگەھینمە ھێزێت ھەڤپەیمانییا نێڤدەولەتی کو د شەڕێ داعشێدا پشتەڤانییا پێشمەرگا کر. ھاریکاریا وان بۆ پێشمەرگا و ھەروەستا ھاریکارییا وان بۆ سوپایێ عێراقێ، یا ستراتیژی و یا ئێکلاکەرەڤە بوو. نموونەکێ زندی یێ ھاریکارییا نێڤدەولەتی بوو، بۆ بەرھنگارییا ئەو تەحەدا یێت مەزنێت ھەڤپشک کو ھاتنە د ڕێکا مەدا.
ھەروەسا گرنگە بەحسێ ھەماھەنگی و ھاریکارییا ناڤبەرا پێشمەرگا و ھێزێت سوپایێ عیراقی بکەین بەرامبەری تیرۆرستا. ب تایبەتی ئەو کارێ پێکڤە یێ کو مە ھەردوولایا پێشمەرگە و سوپایێ عێراقێ ھێزێت حەشدا شەعبی ڤێکڕا کری بتایبەتی ل دەڤەرێت مادەیا (١٤٠)، کو جھەکە مە ڤێکڕا کار کر دگەل سوپایێ عێراقێ بۆ بەرقەرارکرنا ئاسایشێ و ئارامیێ و تەناھیێ. ھەر ئەڤرۆ و د ڤێ ھەلکەفێدا جارەکا دی ئەم سەرێ ڕێزێ بۆ خوینا وان شەھیدا دچەمینین ئەوێت کو د بەرگریکردن ل عێراقێ گیانێ خۆ فیدا کری چ سوپایێ عێراقێ بیت، چ حەشدا شەعبی بیت و چ پێشمەرگە بن. ب باوەرییا مە داعش ھێشتا داعش گەف و مەترسییەکا جددییە لسەر ئاسایش و ئێمناھییا عێراقێ و ڤێ دەڤەرێ.
ژبەر ھندێ گەلەک گرنگە و گەلەک ژی پێدڤییە ھاریکارییا بەردەوام ھەبیت دناڤبەرا سوپایێ عێراقێ و ھێزێت پێشمەرگەیدا، دڤێت ئەڤ کاریکاری و ھەڤکاری بەردەوام بیت و بلا بیرا مە بھێت کو مە ھەمییا ڤێکڕا خوین یا دای بۆ بەرگریکرنێ ل عێراق و کوردستانێ. ئەز ھیڤیدارم ئەڤ ھاریکارییا بەردەواما مە، ئەنجامێ وێ تەناھییەکا سەرتاسەری بیت بۆ عێراقێ و پاشەڕۆژەکا گەش بۆ عێراقێ و بۆ کوردستانێ و بۆ ھەمی خەلکێ کو ل عێراقێ دژین. پێشمەرگە بەشەکە ژ سیستەمێ عێراقێ یێ بەڕەڤانیێ، لەوما چاڤەڕێ تێتە کرن عێراق ئەرکێ خۆ یێ یاسایی ل بەرامبەر پێشمەرگەی جی بجی بکەت و پشتەڤان بیت و چەکدارکرنا پێشمەرگەی، جێبەجێ بکەت. پێشمەرگە مەترسی نییە، پێشمەرگە بەرگریکارە ل عێراقێ و ل کوردستانێ و ل مرۆڤایەتیێ.
سوپاس و پێزانین و دەستخۆشی بۆ ھێزێت ئەمەریکا و دۆستێت مە یێت دی یێت ھەڤپەیمانییا نێڤدەولەتی، بۆ پشتگیرییا وان یا بەردەوام ل پرۆسا چاکسازیێ یا وەزارەتا کاروبارێت پێشمەرگەی بۆ ڕێکخستنەڤە و ئێککرنا ھێزێت پێشمەرگەی.
ئەڤ پرۆسەیە نە وەکی مە دڤێت، و نە وەکی وان دڤێت، لدویڤ تمووحێت مھنییە. کێشە یێت ھەی و ھێدی یا بڕێڤە دچیت. پێدڤییە ئەم ھەمی لایەک کارەکێ جددی بکەین و ڤێ پرۆسێ سەربێخین. چێنابیت ئەم دۆست و ھەڤپەیمانێت خۆ کو ب جددی کار دکەن بۆ ئێکگرتنا ھێزێت پێشمەرگەی، بێ ئومێد بکەین.
بۆ ڤێ چەندێ، پەیاما من بۆ دۆستێت مە یێت ھەڤپەیمان ئەڤەیە، ئەم دێ بێژینە وان ڕاستە ئەڤ پرۆسە یا ھێدی بڕێڤە دچیت، بەلێ ئیرادەکا جددی مە یا ھەی بۆ ھندێ ھێزێت پێشمەرگە بکەینە ھێزەکا نیشتمانی یا کوردستانی و مە دێ ئێک ھێز ھەبیت و ئێک وەزارەت دێ ھەبیت و ئێک سەرکردایەتی دێ ھەبیت بۆ بڕێڤەبرنا پێشمەرگەی. گاڤ ب گاڤ دێ ھەمی ئاستەنگ و ئاریشا چارەسەر کەین، ھەتا ب ئانەھیا خودێ دگەھیتە دویماھییا ڤێ پرۆسێ.
ئەم بدروستی پابەندین کو لەشکرەکێ ئێکگرتی یێ پێشمەرگەی ھەبیت. لەشکرەکێ نیشتمانی بیت کو دبن ڕێڤەبەری و کۆنترۆلا حکوومەتا ھەرێما کوردستانێ و وەزارەتا پێشمەرگەی دا بیت.
دەرچوویێت ھێژا،
ژبیر نەکەن، کۆلێژا سەربازی یا زاخۆ، ھوین یێت پەروەردە کری و پێگەھاندی، داکو وەکی فەرماندێت زانا و خودان شیان، دگەل پاراستنا کوردستانێ، دادپەروەریێ و مرۆڤاھیێ ژی بپارێزن. پرەنسیپ و ڕەوشتێت بلند یێتنیشتمانپەرەوریێ، قوربانیدان و دیسپلین، ئەو بنەمایێت سەرەکینە کو پێدڤییە ھەرگاڤ د ھزر و دلێ وەدا بمینن و بەردەوام بیر ل ڤان پرەنسیپا بکەنەڤە.
ب خویندن و پەروەردە و فێربوونا ھەوە ل ڤێ کۆلێژا سەربازی، ب وانەیێت وەلاتپارێزی و دلسۆزیێ بۆ ئەرکێ خۆ و بۆ ئاخا خۆ، نە ھەر دناڤ ڕێزێت پێشمەرگەیدا، ھوین د ناڤ ھەمی جڤاکێدا، دشێن ڕۆلەکێ جدا و گرنگ بگێڕن. ھون دشێن ببنە نموونە و ئیلھامبەخشێت نڤشێت داھاتی، بۆ پاشەڕۆژەکا باشتر.
ڕۆلێ ھەوە نە بتنێ یێ مەیدان و قادێت شەڕییە، بەلکی ئەرکێ ھەوە دڤێت مەزنتر بیت بۆ ئاڤاکرنا جڤاکەکا ئارام و تەنا بیت. ھەروەسا بەر‌پرسیارییەکا ھەوە یا دی، ئەوە کو بەھایێت دیموکراسیێ و مافێت مرۆڤی بپارێزن. کار بکەن داکو گرنگییا ڤا بەھایا دناڤ جڤاکێدا زێدەتر بەلاڤ ببیت. ھون ببنە نموونەیەک بۆ پاراستنا دادپەروەریێ و پێکڤەبوونێ و بەڕەڤانیێ ل مافێت ھەمی ھەڤوەلاتی یێت ھەرێما کوردستانێ.
مە ھەمیا باوەری یا ب ھەوە ھەی کو دێ شێن بەرامبەر تەحەدیا ڕاوەستن و د ئەرکێ خۆدا سەرکەڤن، داکو ب باشترین شێوە خزمەتا وەلاتێ خۆ بکەن. داکو د چارچۆڤەیا وەزارەتا کاروبارێت پێشمەرگەیدا، ھێزا نیشتمانییا کوردستانێ بن. چ جارا نەبنە تەرەف، د کێشە و ناکۆکی یێت سیاسیدا.
ئامادەبوویێت ھێژا،
ھەر د ڤێ دەلیڤێدا، دەربارەی ڕەوشا ئالۆز یا ڕۆژھەتا ناڤین، من دڤێت تەئکیدێ لسەر ھەلوێستا ھەرێما کوردستانێ بکەم کو ئەم دگەل ڕاوەستیانا شەڕی و چارەسەرکرنا ئاشتیانەینە یا ھەمی کێشە و ئاریشان. مە ب ھیچ ڕەنگەکی نەڤێت ھەرێما کوردستانێ و عێراق، بکەڤنە ناڤ ڤان ئالۆزییا. دڤێت ھەمی ھەول بێنە دان، داکو ڕەوش ئالۆزتر نەبێت.
ل دویماھیێ، سوپاس و پێزانین و دەستخۆشییەکا تایبەت بۆ مامۆستا و بەر‌پرسیار و ڕێڤەبەرێت کۆلێژا سەربازی یا دو یا زاخۆ. کار و خزمەت و ماندیبوونا وان، جھێ ڕێزەکا مەزنە. ئەرکێ وان پیرۆزە و ڕۆلێ وان گەلەکێ گرنگە بۆ باشترکرن و بەرەڤپێشبرنا ئەرکێ پێشمەرگەی، بۆ پێگەھاندنا نڤشەکێ وەلاتپارێز لسەر بنەمایێ زانستێت سەربازی و ئینتیما و ڤیانا وەلاتی.
ئەرک و خزمەتا کو ھوین دکەن، ئاڤاکرنا کۆلێژ و ئەکادیمی یێت سەربازی، باشترین وەفادارییە بۆ خەبات و قوربانیدان و ڕۆلێ دیرۆکی یێ پێشمەرگا، بۆ ھندێ دا پشتڕاست ببن کو پاشەڕۆژا پێشمەرگا دێ یا باشتر بیت.
سلاڤ و ڕێز و دروود بۆ گیانێ پاقژێ ھەمی شەھیدا، ئەڤێت کو بۆ کوردستانێ خەبات کری و سەر دانای. سلاڤ بۆ شەھیدێت زندی، بۆ ھەمی وانقەھرەمانێت کو د ئەرکێ پاراستنا کوردستانیدا بریندار بووی. ئەم دبێژینە وان، خزمەتا وە و خەباتا وە مە یا لبەر چاڤە.
ھنگ قوتابی یێت خۆشتڤی، ھەر سەرکەفتی بن و ھیڤییا من پاشەڕۆژەکا گەشە بۆ وە ھەمیا و جارەکا دی پر ب دل پیرۆزباھییەکا گەرم ل وە ھەمیا دکەم و سەرکەفتی بن د ژیانا خۆدا.
زۆر سوپاس.
ئەم بابەتە 15899 جار خوێندراوەتەوە