پەیامی کورد   ...   سەرۆک بارزانی پێشوازی لە باڵیۆزی پۆلەندا لە عێراق کرد

ڕۆژی یەکشەممە 17ی تشرینی دووەمی 2024 لە سەلاحەددین سەرۆک مەسعوود بارزانی پێشوازی لە  مارجن کوبیاک باڵیۆزی پۆلەندا لە عێراق کرد.

لە دیدارەکەدا باڵیۆزی پۆلەندا لە عێراق پیرۆزبایی سەرکەوتنی پڕۆسەی هەڵبژاردنی پەرلەمانی کوردستان و سەرکەوتنی پارتی دیموکراتی کوردستان وەک براوەی یەکەم لە سەرۆک بارزانی کرد. هەروەها پێزانینی بۆ ڕۆڵی سەرۆک بارزانی و دامەزراوەکانی هەرێمی کوردستان لە بونیاتنانی سەقامگیری و بووژانەوەی هەرێم هەبوو، ڕاشیگەیاند ووڵاتەکەی بە بایەخێکی زۆرەوە سەیری ڕۆڵی هەرێم لە عێراق و ناوچەکەدا دەکات و پۆلەندا خوازیاری ئەوەیە پەیوەندی و دۆستایەتی لەگەڵ هەرێمی کوردستان لە بواری پەروەردە و خوێندنی باڵا و کشتوکاڵ و بوارەکانی تر پەرەبستێنێت.

هەر لەو دیدارەدا سەرۆک بارزانی سوپاسی باڵیۆزی پۆلەندا لە عێراقی کرد و جەختی لە دۆستایەتی و پەیوەندییەکانی هەردوولا کردەوە.

سەرۆک بارزانی وێڕای ئاماژەدان بە هەڵبژاردنەکانی پەرلەمانی کوردستان ڕایگەیاند بەشداری گەلی کوردستان بە ڕێژەیەکی بەرچاو لە هەڵبژاردن و لە کەشێکی ئارام دا سەری هەموومانی بەرز کردەوە.  ئەوەشی خستەڕوو کە هەروەکچۆن هەڵبژاردن سەرکەوتوانە بەڕێوەچوو، قۆناغی پێکهێنانی حکوومەت و دانووساندنی لایەنەکان بە سەرکەوتوویی دەگاتە ئەنجام و ڕاشیگەیاند خوازیاری پێکهاتنی حکوومەتێکی بنکەفراوانین ئەویش بەپێی ئیستحقاقی هەڵبژاردن.

هەر لەو دیدارەدا سەردانی ئەم دواییەی سەرۆکوەزیرانی عێراق بۆ هەرێمی کوردستان و هەروەها هەوڵەکان بۆ پاراستنی سەقامگیری عێراق و دوورخستنەوەی عێراق لە مەترسییەکانی داهاتوو و هاوکێشەکانی ناوچەکە، گفتوگۆیان لەبارەیەوە کرا.