پەیامی کورد   ...  مه‌سروور بارزانی ڕەزامەندی لەسەر نۆژەنكردنەوەی یاریگای شەهید فڕانسوا هەریری دا

سەرۆكی حكوومەتی هەرێمی كوردستان ڕەزامەندی لەسەر نۆژەنكردنەوەی یاریگای شەهید فڕانسوا هەریری دا، بۆ ئەو مەبەستەش ئەمشەو، پارێزگاری هەولێر سەردانی یاریگاكەی كرد و وا بڕیارە لە قۆناغی یەكەمدا چیمەنی یاریگاكە بگۆڕدرێ و لە قۆناغەكانی داهاتووش دا تەواوی یاریگاكە نۆژەن بكرێتەوە.

ئەمشەو، 5ی 11ی 2024، پارێزگای هەولێر ڕایگه‌یاند، "دوای ئەوەی سەرۆکی حکوومەتی ھەرێمی کوردستان ڕەزامەندی دا بۆ نۆژەنکردنەوەی یاریگای فەڕانسوا ھەریری، لە ماوەیەکی کەم دا وەک قۆناغی یەکەم دەست بە گۆڕینی چیمەنی یاریگاکە دەکرێت، ئەمشەو ئومێد خۆشناو، پارێزگاری هەولێر، سەردانی یاریگای شەهید فەڕانسوا هەریری کرد و لە نزیکەوە لەگەڵ ڕاهێنەری یانەی هەولێر و ئەندامانی دەستەی کارگێڕی و یاریزانانی یانەکە، بەدواداچوونی بۆ چۆنیەتی گۆڕینی چیمەنی یاریگاکە کرد وەک قۆناغی یەکەم، کە چاوەڕێ دەکرێت لەم نزیکانە دەستی پێبکرێت."

ئاماژەی بەوەش داوە، كە "پارێزگاری هەولێر، وێڕای دەست خۆشی لە یاریزانان و ڕاهێنەر و سەرۆکی یانە و ئەندامانی دەستەی کارگێڕی، دڵخۆشی خۆی بەدەرنجامەکانی یانەی هەولێر لە خولی ئەستێرەکانی عێراق نیشاندا و هیوای سەرکەوتنی زیاتری بۆ خواستن و هەموو پاڵپشتی و هاوکارییەکی خۆشی بۆ سەرکەوتنی یانەکە دووپاتکردەوە."

بۆ وەبیرهێنانەوە، باسی لەوەش كردووە، كە "یاریگای شەھید فەڕانسوا ھەریری یاریگایەکی نێودەوڵەتی یانەی ھەولێرە و بە دووەم گەورەترین یاریگای وەرزشی دادەندرێت لە عێراق، لە ساڵی 1956 لەگەڵ درووستبوونی یانەی ھەولێر دروستکراوە و لە کۆتایی ساڵی 2001 بەناوی شەھید "فەڕەنسۆ ھەریری" کراوە، لە ساڵی 2009 بووەتە یاریگایەکی نێودەوڵەتی، ئێستاش ئەو یاریگایە بووەتە بەشێکی دیار و بەرچاو لە مێژووی ھەولێر و جێی شانازی ھەموو وەرزشوان و وەرزش دۆستانە."