پەیامی کورد   ...   ناوه‌رۆكی كۆبوونه‌وه‌ی شاندی پارتی و بریکاری وەزیری کاروباری دەرەوەی چین

لە درێژەی سەردانی فەرمی شاندی پارتی دیموكراتی كوردستان بە هاوڕایەتی هێمن هەورامی ئەندامی مەکتەبی سیاسی بۆ ووڵاتی چین، لە پەکینی پایتەخت  کۆبوونەوەیەکی وورد و چڕیان لەگەڵ د. جین شین بریکاری وەزیری کاروباری دەرەوە ئه‌نجامدا.

له‌ سه‌ره‌تای كۆبوونه‌وه‌كه‌دا جین شین بە گەرمی بەخێرهاتنی شاندی پارتی دیموكراتی كوردستانی کرد و خۆشحاڵی خۆی بۆ ئەم دیدارە دەربڕی و باسی لە هەڵوێست و سیاسەتی چین بەرامبەر هەرێمی کوردستان بە گشتی و پارتی دیموکراتی کوردستان بە تایبەتی کرد و ووتی، "پارتی کۆمۆنیستی چین و حکوومەتی چین بە بایەخەوە لە  ڕۆڵ و پێگەی پارتی و هەرێمی کوردستان لە ناو هاوکێشە سیاسی و ئەمنی و ئابوورییەکانی  عێراق و ناوچەی ڕۆژهەڵاتی ناوەڕاست دەڕوانن و بانگهێشت کردنی شاندێکی فراوانی پارتی وەک یەکەم شاندی پارتە کاریگەرەکانی ناوچەی ڕۆژهەڵاتی ناوەڕاست و باکووری ئەفریقیا دەرخەری ئەو بایەخ و پێزانینەیە کە چین بە پارتی دیموکراتی کوردستان و هەرێمی کوردستانی دەدات.

هێمن هەورامی سەرۆکی شاندی پارتی، وێڕای سوپاس و پێزانینی بۆ ئەم بانگهێشتە و ئەو زنجیرە دیدار و سەردان و کۆبوونەوانە، سڵاو و رێزی تایبەتی سەرۆک بارزانی لە ڕێگه‌ی هێمن هەورامی یەوە بۆ سەرۆک شی جینگ پینگ و سەرکردایەتی پارتی کۆمۆنیستی فەرمانڕەوای چین نارد.

دواتر بە ووردی سیاسەت و هەڵوێست و بۆچوون و تیڕوانینی پارتی لە سەر دۆخی سیاسی ناوخۆیی ، دۆخی عێراق لە ڕووی ئەمنی و سیاسی و ئابووری، دۆخی سووریا و دۆخی پرۆسەی ئاشتی و ڕۆڵی پارتی و سەرۆک بارزانی و هاوکێشە گشتیەکانی ناوچەکە و دەرفەتەکانی وەربەرهێنانی زیاتری چین لە هەرێمی کوردستان و پەیوەندییە کلتوورییەکانی نێوان هەردوولایان ڕوونکردەوە.

دوای گفتوگۆیەکی وورد، لە لایەن بەڕێزیانەوە ئێوارە خوانێکی تایبەتی بۆ شاندی پارتی دیموكراتی كوردستان ڕێکخرا.