نێچیرڤان بارزانى : خه‌لكێ كوردستانێ پشته‌ڤانێ پارتییه
پەیامی کورد ... نێچیرڤان بارزانى : خه‌لكێ كوردستانێ پشته‌ڤانێ پارتییه
نێچیرڤان بارزانی، جێگری سەرۆکی پارتی دیموکراتی کورستان، لە گوتارێکدا لە دهۆک ڕایگەیاند ئامانجی پارتی ئەوەیە لە قۆناخی داهاتوو، هەرێمی کوردستان بگەیێنێتە قۆناخێکی پێشکەوتووتر و سەرکەوتووتر، گوتیشی ئێستا ناوچەکە بە دۆخێکی ئاڵۆز تێدەپەڕێت، هەربۆیە "پێویستمان بە سەرکردایەتیی بەهێز هەیە، کە ئەویش پارتییە."
جه‌ماوه‌رێ خۆشتڤى،
خه‌لكێ كوردستانپه‌روه‌ر و پارتیپه‌روه‌رێ به‌هدینا،
خوشك و برایێت هێژا،
هنگ هه‌مى گه‌له‌ك ب خێر هاتن سه‌رچاڤا و سه‌ر سه‌را،
د ده‌ستپێكرنێ دا، سڵاڤ و ڕێز و خۆشه‌ویستی یێت جه‌نابی سه‌رۆك بارزانی بۆ وه هه‌میا.
به‌لێ..
(20)ێ ڤێ هه‌یڤێ ڕۆژا ده‌نگدانێیه. ئه‌ڤرۆ دگه‌ل برایێ خۆ مه‌سروور بارزانی و سه‌ركردایه‌تییا پارتی ئه‌م هه‌می ڤێكڕا دگه‌ل هه‌وه خه‌ڵكێ خۆڕاگر و تێكۆشه‌رێ به‌هدینا، جاره‌كا دی ل ڤی باژێڕێ خۆڕاگر سۆز و په‌یمانێ، بۆ ڕێبازا خۆ، ڕێبازا بارزانى، ڕێبازا شه‌هیدا و یا ئازادیخازێت كوردستانێ نویڤه‌كه‌ین و سه‌ركه‌فتنه‌كا دێ بۆ پارتا خۆ، د دیرۆكا پڕ سه‌روه‌رییا به‌هدینا و كوردستانێ دێ تۆمار بكه‌ین.
ئه‌ڤ هه‌لبژارتنه بۆ كوردستانێ، بۆ پارتى، بۆ هه‌وه خه‌لكێ هێژایێ به‌هدینا، گه‌له‌كا گرنگه. یا گرنگه بۆ كوردستانێ، داكو شه‌رعیه‌تا ده‌زگه‌هێت خۆ یێت ڕێڤه‌بردنێ د وه‌لاتێ خۆدا نویكه‌ینه‌ڤه. یا گرنگه بۆ پارتى، داكو سه‌ركه‌ڤیت، چونكى سهركهفتنا پارتى، سهركهفتنا كوردستانێیه.
هه‌ڤالینه،
سهركهفتنا پارتى، مسۆگه‌ریا پاراستنا مافێت هه‌مى خه‌لكێ كوردستانێ و یێت وان پێكهاتانه ئه‌وێت دگه‌ل مه د ڤی وه‌لاتیدا دژین، مسۆگه‌رییا پاشه‌ڕۆژه‌كا گه‌شتره بۆ كوردستانی.
ئه‌م یێ ل ده‌ڤه‌ره‌كا پڕ كێشه و ئاڵۆز دژین، د ڤێ ده‌ڤه‌رێدا مه پێویستی یا ب سه‌ركردایه‌تییه‌كا بهێز هه‌ی، مه پێویستی یا ب حزبه‌كا بهێز هه‌ی، بێ شك ئه‌و سه‌ركردایه‌تی هه‌ر پارتییه، ئه‌و حزبیش هه‌ر پارتییه. ئه‌و حزبه، ئه‌و پارتییه یا كو مافێت هه‌رێما كوردستانێ هه‌می پێكهاتێت وان زامن دكه‌ت و به‌ره‌ڤ پاشه‌ڕۆژه‌كا گه‌ش و ئارام ده‌رباس دكه‌ت.
ئه‌ڤ هه‌لبژاردنه یا گرنگه بۆ به‌هدینا، چونكى خه‌لكه‌كێ د خه‌یالا خۆدا وسا یا حساب كرى كو ئه‌ڤ سیستمێ ڤێ جاری هاتیه دانان یێ ده‌نگدانێ، دێ شێن ب ڤێ سیسه‌مێ ڕۆڵ و كاریگه‌رییا پارتى و ب تایبه‌تی كاریگه‌رییا به‌هدینا لسه‌ر ده‌نگده‌رێت پارتی بچویك بكه‌ن. ژبه‌ر هندێ جه‌ماوه‌رێ خۆشتڤیێ به‌هدینا، دڤێت چ جارا نه‌هێلن خه‌ونا نه‌حه‌ز و نه‌یارێت پارتی ببیته ڕاستی، ئه‌ڤرۆ ئه‌ڤا ئه‌ز دبینم، دلگه‌می و دلسۆزی و په‌رۆشییا هه‌وه ب هاواره‌كان بلند گازی دكه‌ت به‌هدینا ناڤه‌نده‌كا سه‌ره‌كی یا هێز و شیان و باوه‌رێت پارتینه. ڤێ جارێ ژى، ده‌نگێت هه‌وه، هه‌ر بۆ پارتى و بۆ لیستا (سه‌د و نۆتێ) یا پارتى دیموكراتى كوردستانه.
پارتى و به‌هدینا، پارتى و ڕێبازا كوردایه‌تیێ یا بارزانى، خوین و گۆشتێت به‌ده‌نه‌كینه. بناغه و ستوینێت سه‌ره‌كى یێت كوردینییێ و وه‌ڵاتاپارێزیێنه. په‌یوه‌ندییا پارتى و به‌هدینا، بتنێ په‌یوه‌ندییه‌كا حزبى و سیاسى نییه. پارتى و دیرۆكا خه‌باتا پارتى، به‌شه‌كێ گرنگ و سه‌ره‌كى یێ ناسناما جڤاكى و كولتوورى یا ده‌ڤه‌را به‌هدینایه.
هیچ مالباته‌ك ل به‌هدینا نییه كو چیرۆك و سه‌رهاتییه‌كا وان یا دلسۆزى و وه‌فاداریێ، یا خه‌بات و تێكۆشینێ دگه‌ل پارتى و ڕێبازا بارزانى نه‌بیت؟ تو هه‌ر ده‌رگه‌هێ بكوتی ئه‌ڤرۆ ل بادینان دێ بۆته به‌حسێ چیرۆك و سه‌رهاتییا خۆ كه‌ت ل خه‌بات و به‌رخۆدانێ دگه‌ل پارتی بۆ سه‌ربلندی و سه‌رفه‌رازییا گه‌لێ كوردستانێ.
هه‌ڤالینه،
ژ ڕۆژا ئێكێ یا چێبوونا پارتى، خه‌لكێ به‌هدینا، جوگرافیا به‌هدینا، پێكهاته و به‌شه‌كێ سه‌ره‌كى و گرنگێ پارتى بووینه. په‌یوه‌ندییا پارتى و به‌هدینا، ب گیان و خوینا شه‌هیدا، ب باوه‌رى و عه‌قیده‌كا ڕۆحى یا هاتیه ئاڤاكرن. ب سه‌دان ناڤێت دیار و یێت مه‌زن یێن قه‌هره‌مانێت به‌هدینا، ب هزارا شه‌هید، كو به‌شه‌كێ گرنگێ دیرۆكا ڤێ ده‌ڤه‌رێنه، پێشمه‌رگه و قه‌هره‌مانێت پارتى و قوتابى و په‌روه‌ردێت ڕێبازا كوردایه‌تیێ و ڕێبازا بارزانی بووینه.
خه‌لكێ به‌هدینا، ژ ڕۆژا ئێكێ یا دامه‌زراندنا پارتى و هه‌تا ئه‌ڤرۆ، به‌رده‌وام ڕێڤینگێت ڤێ ڕێكێ بووینه. چونكى وان هه‌میا، خه‌ون و خۆزى و هیڤییێت خۆ، بۆ ئازادیێ، بۆ ڕزگاریێ، بۆ ئاڤاكرنا وه‌لاتى و بۆ پاشه‌ڕۆژه‌كا گه‌ش، یێ د پارتى و ڕێبازا بارزانیدا دیتى و له‌وما ب دل و ب گیان ئه‌ڤ ڕێبازه یا هه‌لبژاردی.
سه‌رده‌مێ شۆڕشێ، بوهست بوهست، گاڤ ب گاڤ، هیچ جهه‌كێ خاكا به‌هدینا نه‌بوویه كو ب داستان و چیرۆكێت سه‌ركه‌فتنێ یێت پارتى و پێشمه‌رگه و شه‌هیدێت پارتیڤه، نه‌هاتبیته گرێدان. خۆ جهه‌ك ژى نییه كو یادگارى و سه‌ربۆرێت پێشمه‌رگاتیێ و به‌رخودان و خۆڕاگریێ لێ نه‌بن.
ژبه‌ر هندێ گه‌لى خوشك و برایا، چیرۆكا پارتى و به‌هدینا، چیرۆكا عه‌شق و ئه‌ڤینه‌كا به‌رده‌وامه، ب هیچ شێویه‌كێ و ب هیچ ده‌سته‌كێ ژێك ناهێنه جداكرن.
هه‌ڤالینه،
هیچ كه‌سه‌ك، هیچ ئالییه‌كێ سیاسى، هیچ فكره‌كا غه‌ریب دگه‌ل هزر و سروشت و پێكهاتێ جڤاكى و یا كولتوورى یا به‌هدینا، چ جارا ئه‌و هێز نه‌بوویه و نابیت كو بشێن به‌ینا پارتى و به‌ینا جه‌ماوه‌رێ خۆشتڤیێ به‌هدینان خراب بكه‌ن.
خوشك و برایێت خۆشتڤى،
جه‌ماوه‌ر و خه‌لكێ به‌هدینا یێ هێژا..
ب دلسۆزى و پشته‌ڤانییا خورت و به‌رده‌واما به‌هدینا بۆ پارتى، هه‌رگاڤ پارتى د گۆڕه‌پانا سیاسى یا كوردستانێدا خودان هێز و بڕیار بوویه. هه‌رگاڤ پارتى یا سه‌ركه‌فتى بوویه. سهركهفتنا پارتى ژى، هێز و سهركهفتنا كوردستانێیه.
وه‌ختێ كو هوین ل پشت پارتینه، نه چه‌ك و تۆپ و فڕۆكێت دوژمنا، نه كیمیاباران و ئه‌نفال و وێرانكرنا كوردستانێ، نه دڕه‌نده و تیرۆرستێت داعش، نه ژى زه‌خت و پیلانێت سیاسى یێت نه‌یارێت مه، چ جارا پارتى نه‌شكاندیه و پارتی یا سه‌ربلنده ب پشته‌ڤانییا هنگۆ و دێ یا به‌رده‌وام بیت ل ڤێ سه‌ركه‌فتنێ.
ب پشتگیرییا هه‌وه مه قۆناغێت گه‌له‌ك سه‌خت و زه‌حمه‌ت مه ده‌رباز كرن، هه‌ر ب پشتگیرییا هه‌وه، ب هیڤى و ئومێده‌كا مه‌زن، ب ئانه‌هییا خودێ دێ به‌ره‌ڤ پاشه‌ڕۆژه‌كا گه‌شتر ژی چین.
هندى به‌هدینا هه‌یه،
هندى دلسۆزى و وه‌فادارییا هه‌وه خه‌لكێ به‌هدینا هه‌یه،
پارتى دێ هه‌ر هه‌بیت و دێ هه‌ر سه‌ركه‌ڤیت.
به‌لێ،
پارتى دێ یا سه‌ركه‌فتى بیت، داكو ڕۆژ بۆ ڕۆژێ زێده‌تر خزمه‌تا كوردستانێ بكه‌ت. چونكى سهركهفتنا پارتى، یه‌عنى خزمه‌ت و ئاڤه‌دانى. یه‌عنى پێشكه‌فتن و به‌ره‌ڤپێشچوونا به‌رده‌واما كوردستانێ.
به‌رێ خۆ بده‌نێ،
ببینن ل هه‌ر جهه‌كێ كو ده‌سه‌لاتا پارتى هه‌بووبیت، چ خزمه‌تگوزارى و ئاڤه‌دانى و پێشكه‌فتن و ئاڤه‌دانی لسه‌ر ده‌ستێ پارتی هاتییه جیبجیكردن؟ ببینن كا ساڵ بۆ سال، سه‌رباری هه‌می وان ئاسته‌نگا یێت كو بۆ پارتی و بۆ سه‌ركردایه‌تییا پارتی و بۆ حكومڕانییا پارتی تێته كرن، كا دێ چه‌وا ب پشته‌ڤانییا وه پارتی سال بۆ سال و ڕۆژ بۆ ڕۆژێ باشتر ئاڤه‌دانی و خزمه‌تێ پێشكه‌ش دكه‌ت؟
دهۆك، زاخۆ، ئامێدى، سێمێل، شێخان، به‌رده‌ڕه‌ش، ئاكرێ و هه‌ر جهه‌كێ كو ده‌سهه‌لاتا پارتى لێ بیت، ببینن كا چ هاتییه كرن؟ بێ گومان ئه‌ڤه هێشتا تمووحێت مه نینه و مه دڤێت پێنگاڤێت مه‌زنتر ژی بهاڤێژین.
هه‌ڤالینه،
ڕكه‌به‌رێت مه دگه‌ل هیچ حزبه‌كێ نییه، حزبێت دی و لایه‌نێت دی یێت سیاسی هه‌می هه‌ول دده‌ن وه‌كی پارتی بن، ئه‌ركێ مه، ئارمانجا مه ئه‌ڤه نییه ڕكه‌به‌رییا هیچ حزبه‌كێ بكه‌ین، پارتی دڤێت كوردستانێ ل ڤێ قۆناغێ به‌ره‌ڤ قۆناغه‌كا گه‌شتر و باشتر ببه‌ت، ئه‌ڤه‌یه ئه‌ركێ پارتی.
هه‌ڤالینه،
خزمه‌تكرن، ئه‌ركێ پارتییه. پارتى چ منه‌تا خزمه‌تێ ل خه‌لكێ كوردستانێ ناكه‌ت. ڕاسته ب سه‌ركردایه‌تى و سه‌ركێشیا پارتى، ب ئیداره و حوكمڕانییا پارتى، كاروانه‌كێ دویر و درێژێ خزمه‌تێ و ئاڤاكرنێ ل كوردستانێ یێ بڕێڤه چووى.
به‌لێ ئایا، پرسیار ئه‌ڤه‌یه ئایا:
ـ كێموكاسى هه‌نه؟
ـ ئایا ئاسته‌نگ و كێشه هه‌نه؟
به‌لێ، ئه‌ڤه هه‌مى یێت هه‌ى. ئه‌م ژی ل نێزیكڤه دبینین. لێ وه‌ختێ كار و خزمه‌ت هه‌بیت، ئاڤاكرن هه‌بیت، ئاسته‌نگ و كێماسى و خه‌له‌تى ژى دێ هه‌بن.
ئه‌وێ كو چ نه‌كه‌ت و ڕوونێته خارێ و به‌س گازندا بكه‌ت و بۆله‌بۆلێ بكه‌ت، بێگومان نه‌شێت چ بكه‌ت و دێ به‌س گازندا كه‌ت و دێ ئاخڤیت، پارتی ئه‌و نییه، پارتی خۆ دده‌ته به‌ر به‌رپرسیاریێ.
پارتى و خه‌لكێ كوردستانێ، پارتى و هه‌وه خه‌لكێ به‌هدینا ئه‌ڤ كاروانێ كو ئه‌م به‌حس دكه‌ین ل ئاڤه‌دانكرنێ، ل ده‌ستكه‌فتێت سیاسی و ل به‌ره‌ڤپێشبرنا وه‌لاتی، پارتی و هه‌وه خه‌لكێ به‌هدینان ئه‌ڤ كاروانه پێكڤه مه یا ئینایه پێش، پارتی بێی هه‌وه و بێی پشتگیرییا هه‌وه، بێی جه‌ماوه‌ێ خۆ نه‌شیایه و نه‌شێت ڤێ بكه‌ت، پارتی یا پشتڕاست و پشتگه‌رمه ب پشتگیرییا هه‌وه و ب پشته‌ڤانییا هه‌وه و دێ به‌رده‌وام ژی بیت.
هه‌ڤالینه،
بۆ قۆناغا بهێت ژى، دیسا ب پشته‌ڤانیا هه‌وه، دێ پێكڤه به‌رده‌وام بین. دێ پێكه‌ڤه سه‌ركه‌ڤین. دا پێكڤه باشتر خزمه‌تێ بكه‌ین، باشتر وه‌لاتێ خۆ ئاڤا كه‌ین، هه‌روه‌سا دا پێكڤه كێماسى و ئاسته‌نگ و ئاریشا ژى چاره‌سه‌ر بكه‌ین. دا ڕه‌وشا ژیانا خه‌لكه‌كێ پێدڤى، باشتر بكه‌ین.
دیسا ئه‌ڤرۆ ل دهۆكا ڕه‌نگین دێ جاره‌كا ده پێكڤه بێژمه هه‌وه:
بۆ ڤێ چه‌ندێ بڕیار یا د ده‌ستێ وه‌دا، بۆ ڤێ چه‌ندێ، ڕۆژا (20)ى هه‌یڤێ سۆزا مه بۆ خوینا شه‌هیدێت مه، سۆزا مه بۆ خه‌باتا پێشمه‌رگێت مه، سۆزا مه بۆ دلسۆزێت كاروانێ ڤێ خه‌باتێ و هه‌تا ئه‌ڤرۆ ژی به‌رده‌وامن، ئه‌م هه‌مى ڤێكرا دێ چینه سه‌ر سندۆقێت ده‌نگدانێ، داكو ده‌نگێ خۆ بده‌ینه لیستا 190 یا پارتا دیموكراتا كوردستانێ. لیستا مه لیستا ئارامى و ئاڤه‌دانیێ، لیستا پێكڤه‌یى و خۆڕاگریێ، لیستا (سه‌د و نۆت) یا پارتا دیموكراتا كوردستانێ.
جه‌ماوه‌رێ دلسۆزێ به‌هدینا،
پارتى ڕۆژا ئێكێ لسه‌ر بنه‌ما و ب ناڤێ دیموكراسیێ یا هاتیه دامه‌زراندن. گه‌لێ كوردستانێ هه‌مى شاهدن كو پشتى سه‌رهلدانێ، سالا 1991ێ جارا ئیكێ جه‌نابێ سه‌رۆك بارزانى ل باژێڕێ كۆیێ داخازا هه‌لبژارتن و گهۆڕینا ده‌سهه‌لاتا شۆڕه‌شگێڕى بۆ ده‌سهه‌لاتا شه‌رعى و یاسایى كر. ئه‌ڤه بۆ پارتى، بۆ جه‌ماوه‌رێ پارتی، بۆ خه‌لك و جه‌ماوه‌رێ به‌هدینا جهێ شانازییه‌كا مه‌زنه.
پارتى ب پشته‌ڤانییا خه‌لكى، حوكمڕانییا كوردستانێ یا برێڤه برى. پارتی ده‌سه‌ڵاته‌كا خۆسه‌پێن نه‌بوویه، پارتی به‌رده‌وام ب پشته‌ڤانی و پشتڕاستی و پشتگه‌رمییا ملله‌تێ خۆ ده‌سته‌لات یا وه‌رگرتی و یا به‌رده‌وام بوویه. هه‌ر ب وێ پشتگیرییا خه‌لكى، به‌ڕه‌ڤانى یا ل كوردستانێ كرى. مافێت ده‌ستوورى و یاسایى یێت كوردستانییا، یێت هه‌مى پێكهاتێت كوردستانێ یێت پاراستى. ژ به‌رپرسیاریێ نه‌ڕه‌ڤییه و به‌رپرسانه پارتی سینگێ خۆ یێ دایه به‌ر هه‌مى ته‌حه‌دایه‌كێ و گه‌ف و ئاریشێت كو به‌سه‌ر كوردستانێدا هاتى، پارتی هه‌رگاڤ پێشڕه‌و بوویه بۆ به‌ڕه‌ڤانیكرن ل كوردستانێ و مێژوو شاهێدێ ڤێ چه‌ندێ یه.
پێشمه‌رگێت قه‌هره‌مان ب سه‌ركردایه‌تییا جه‌نابێ سه‌رۆك بارزانى به‌ره‌ڤانی ل كوردستانێ كر. ئه‌گه‌ر قه‌هره‌مانیا پێشمه‌رگا و فیداكاریا وان نه‌با، تیرۆرستێت داعش و نه‌یارێت كوردستانێ، دا وه‌لاتێ مه وێران كه‌ن. ئه‌ڤرۆ ل دهۆكا ڕه‌نگین ئه‌م به‌ژنا خۆ دچه‌مینین بۆ خوینا وان شه‌هیدا و ئه‌م سه‌رێ ڕێز و نه‌وازشێ دچه‌مینین بۆ وان شه‌هیدا، ڕێزێ بۆ وان پشیمه‌رگه و خه‌باتگه‌را نیشێ دده‌ین كو هه‌تا ئه‌ڤرۆ لسه‌ر ڤێ ڕێكێ دبه‌رده‌وامن، زۆرترین زه‌ختێ داعشێ له‌سه‌ر به‌هدینا بوو، ژبه‌ر هندێ ژى به‌هدینا گه‌له‌ك قوربانى دان بۆ شكاندنا تاریاتیێ و بۆ شكاندنا داعش.
ده‌نگ و پشته‌ڤانیا هه‌وه‌یه كو هێز دایه پارتى و ڕێبازا بارزانى داكو ل كوردستانێ، ل به‌غدا، ل ده‌ڤه‌رێ، ل جیهانێ، ببیته ده‌نگ و ڕه‌نگ و ناسناما كوردایه‌تیێ و كوردستانێ.
پارتی ب ده‌نگێت هه‌وه به‌ڕه‌ڤانی ل ماف و ده‌ستكه‌فتێت خه‌لكێ كوردستانێ كرینه، ئه‌م پشتڕاستین كو ڤێ جارێ ژى هنگ دێ پارتى ل ڤێ ئه‌زموونێ سه‌ربه‌رز به‌نه ده‌رێ داكو كوردستان به‌ره‌ف پێش بچیت و مافێت خه‌لكێ وێ بهێته پاراستن. داكو ئارامى و ته‌ناهى، ئاسایش و ئێمناهى، كار و كه‌سابه‌ت، داكو كاروانێ ئاڤه‌دانى و پێشكه‌فتنێ ل كوردستانێ هه‌رێ به‌رده‌وام بیت.
داكو پێكڤه‌ژیان و مافێت هه‌مى پێكهاتێت دینى و نه‌ته‌وه‌یى ل كوردستانێ دپاراستى بن. دیموكراسى و ئازادى و مافێت مرۆڤى پێشكه‌ڤن. داكو قوتابى و لاو و ئافره‌ت، ڕۆلێ خۆ باشتر بگێڕن، مافێت خۆ مسۆگه‌ر بكه‌ن. داكو ئه‌م هه‌مى پێكڤه كار بكه‌ین بۆ چێكرن و ئاڤاكرنا پاشه‌ڕۆژه‌كا گه‌شت بۆ نڤشێ داهاتى یێت كوردستانێ.
پارتى ب پشته‌ڤانیا هه‌وه، نموونێ حوكمڕانییه‌كا جوان یێ نیشێ دای. دهۆك و به‌هدینا، ب گشتی نموونه‌كێ جوان یێ حوكمڕانییا پارتى و پێكڤه‌ژیانێیه.
هه‌ر بژین و هه‌ر هه‌بن،
ژبیر نه‌كه‌ن ڕۆژا ده‌نگدانێ ئێك ده‌نگ ژی بۆ مه زۆره. ئه‌م چاڤه‌ڕێ هه‌وه‌ینه جه‌ماوه‌رێ خۆشتڤیێ به‌هدینا. ئه‌م چاڤه‌ڕێ پشته‌ڤانییا هه‌وه‌ینه ڕۆژا ده‌نگدانێ ئه‌م هه‌می ڤێكڕا به‌ره‌ڤ سندۆقێت ده‌نگدانێ بۆ خوینا شه‌هیدا، بۆ پاراستنا ده‌ستكه‌فتێت كوردستانێ، ده‌نگێ خۆ دێ ده‌ینه لیستا 190 یا پارتی دیموكراتی دیموكراتی كوردستان.
هه‌ڤالینه،
جه‌ماوه‌رێ خۆشتڤی،
هه‌روه‌كی من ل ده‌ستپێكی ووتی، ئه‌ڤرۆ ئه‌ز و برایێ خۆ كاك مه‌سروور ئه‌م پێكڤه یێت هاتییه ڤێرێ، داكو پێكڤه داخازێ ل هنگۆ بكه‌ین كو بچینه سه‌ر سندۆقێت ده‌نگدانێ، بێگومان ئه‌ز دا بۆ هه‌وه به‌حسێ ڤان چار سالا بكه‌م، ب ساناهی نه‌بوو، به‌ری ئه‌م بهێینه ڤێره، ئاخفتنا مه و به‌حسێ مه دگه‌ل كاك مه‌سرووری لسه‌ر هندێ بوو، روئیایا خۆ بۆ پاشه‌ڕۆژێ بۆ من به‌حس دكر كا چه‌وا و چ پلان دێ هه‌بن بۆ ئاڤه‌دانكرنا زێده‌تر و بۆ خۆشگوزه‌رانییا زێده‌تر بۆ ملله‌تێ مه.
گه‌نگه‌شا مه دوو سه‌عه‌تا به‌س لسه‌ر ڤی بابه‌تی بوویه كا دێ ئه‌وا ئه‌و دێ شێت قیادا ڤی باره‌ی بكه‌ت و پاشه‌ڕۆژێ ژى كاروانێ ئاڤه‌دانكرنا كوردستانێ ب ئانه‌هییا خودێ به‌ره‌ڤ قۆناغه‌كا باشتر ببه‌ت. چار سالێت بووری چار سالێت ب ساناهی نه‌بوون. ئه‌ڤ چار پێنج سال، گه‌له‌ك ب زه‌حمه‌ت بوون ل هه‌موو ڕوویه‌كێ ڤه. هه‌م ل ڕوویێ ناڤخۆ و هه‌م ل وان ته‌حه‌دیات و پێشهاتێت سیاسی یێت كو هاتییه پێش. سه‌ره‌ڕای هه‌می ئاسته‌نگ و نه‌خۆشییا، به‌لێ مه دیت سه‌ركردایه‌تییا كابینه‌یه‌كێ كر كو ئه‌ڤرۆ ژی یا به‌رده‌وامه ل خزمه‌تێ و یا به‌رده‌وامه ل پێشكه‌شكرنا پرۆژا بۆ ملله‌تێ مه ل هه‌می كوردستانێ.
ئه‌ز داخازێ لێ دكه‌م ئه‌ڤرۆ ئه‌و ژی كه‌ره‌م كه‌ت و په‌یڤا خۆ پێشكه‌شی وه بكه‌ت لسه‌ر ڤان هه‌لبژاردنانه.
ئەم بابەتە 23270 جار خوێندراوەتەوە