نێچیرڤان بارزانى لەگەڵ فەرماندەی گشتی هێزەكانی هاوپەیمانان كۆبووه‌وه
پەیامی کورد ... نێچیرڤان بارزانى لەگەڵ فەرماندەی گشتی هێزەكانی هاوپەیمانان كۆبووه‌وه
به‌یانی پێنجشه‌ممه ١٣-٦-٢٠٢٤ نێچیرڤان بارزانى، سه‌رۆكى هه‌رێمى كوردستان، پێشوازى له ژەنەڕاڵ جۆول ڤاوڵ فەرماندەی گشتی هێزەكانی هاوپەیمانان لە عێراق و سووریا و شاندێکی یاوەری کرد.
له كۆبوونه‌وه‌یه‌كدا دۆخى ئه‌منى و مه‌ترسییه‌كانى تیرۆر و هه‌ڕه‌شه‌كانى داعش له‌سه‌ر ئاسایش و ئارامى له عێراق و سووریا تاوتووێ كران و جه‌خت له پێویستی به‌رده‌وامی هاوكاری هاوبه‌ش و هه‌ماهه‌نگى له‌نێوان پێشمه‌رگه و سوپاى عێراق و هێزه‌كانى هاوپه‌یماناندا كرایه‌وه.
له ته‌وه‌رێكى دیكه‌ى كۆبوونه‌وه‌كه‌دا كه وه‌زیرى كاروبارى پێشمه‌رگه و سوپاسالارى پێشمه‌رگه ئاماده‌ى بوون، داكۆكى له سه‌رخستنى پڕۆسه‌ى چاكسازى له وه‌زاره‌تى كاروبارى پێشمه‌رگه و یه‌كخستنه‌وه‌ى پێشمه‌رگه كرایه‌وە، له‌مباره‌یه‌وه هه‌ردوولا له‌سه‌ر گرینگی پشتیوانیكردنى پڕۆسه‌كه و نه‌هێشتنى ته‌گه‌ره‌كانى به‌رده‌مى، هاوڕا بوون.
دۆخى ناوچه‌كه به‌گشتى و چه‌ند پرسێكى جێى بایه‌خى هاوبه‌ش، لایه‌نێكى دیكه‌ى كۆبوونه‌وه‌كه بوو.
ئەم بابەتە 33964 جار خوێندراوەتەوە