ووڵامێك بۆ پاڤێڵ تاڵەبانی
پەیامی کورد ... ووڵامێك بۆ پاڤێڵ تاڵەبانی
لە دیداری مێری لە شاری هەولێر پاڤێڵ تاڵەبانی بەداخەوە وەك بڵێی هێشتا تای بانگەشە بەری نەدابێت لەچوارچێوەیەكی نامەنتقی و لووتبەرزانە و حیساب نەكردن بۆ ئیرادەی خەڵكی كوردستان و ئەنجامەكانی هەڵبژاردن و ئادابی ئاخاوتن دەرفەتی بۆ ڕەخسا، دیسان چەواشەكارانە و تێكدەرانە بدوێت. هەروەك چۆن خۆیشی نەیشاردەوە كە شارەزا و مامۆستای تێكدانن.
گەلی كوردستان لە كەشێكی ئارام و ئاشتیانەدا لە بیستی ئۆكتۆبەر بەشداری هەڵبژاردنێكی نموونەیی بوو و ئەم هەڵبژاردنە لەلایەن كۆمەڵگەی نێودەوڵەتیش پێشوازییەكی گەرمی لێكرا. هیچ یەك لەو هاتوهاوارانەی پاڤێڵ تاڵەبانی لە كاتی بانگەشەدا ئیدعای دەكرد نەهاتەدی، ئەگەرچی هەڵبژاردنەكە بووە چوار بازنە و كورسی كۆتایش كەم كرایەوە، بەڵام ڕووخاندنی پارتی و كۆتایهێنان بە پارتی، كە پاڤێڵ پڕ بە گەرووی خۆی دەیقیڕاند، ڕێك پێچەوانەكەی دەرچوو، كۆمیسیۆن سەركەوتوو بوو و هەڵبژاردنێكی پاك و بێگەرد و، بەبێی ئەو زۆمبیانەش بەڕێوەچوو، كە پاڤێڵ ئیدعای دەكرد. بافڵ كە خۆی بە ماتماتیكزان لە قەڵەم دەدات چاوی ئەوە نابینێت، كە پارتی ڕێك دوو هێندەی یەكێتییەكەی ئەو دەنگی هێناوە.
بافڵ لەم پانێڵە زۆر قسەی بێسەروبەری كرد، كە ڕەنگدانەوەی عەقڵییەتی سنووردار و ناواقعبین و خۆسەپێنی ئەوە، ئەو گوتی دەڤەری سەوز بە ڕاستی سەوزە، ئەگەر ئەوە تاكڕەویی و خۆسەپاندن نەبێ ئەی چ ناوێكی لێ دەندرێت، بافڵ زۆر بە ئاسانی دەنگ و ڕەنگی دەیان هەزار دەنگدەری تری سنووری سلێمانی نادیدە دەگرێت و چاوی تەنیا خۆی و ڕەنگی حزبەكەی خۆی دەبیێنت، باشە ئەگەر پاڤێڵ بەقەدەر پارتی دەنگی هێنابا لە پانێڵەكە چۆن قسەی دەكرد؟!..
بافڵ لە پانێلەکەدا پەنای بۆ هەموو جۆرە ناڕاستیەک برد و چیرۆکی سەیر و سەمەرەشی هۆنییەوە، گوایە لە دهۆک ڕێگری لە خوێندنی ئەندامانی یەکێتی دەکرێت و دوکانیان دەڕووخێندرێت. ئەو چەواشەکارییەی پێش ئەوەی بۆ خەڵکی ئاسایی مایەی پێکەنین بێت، لای ئەندامانی خۆیان لە دهۆک دەبێتە درۆیەکی شاخدار و ڕووی ڕاستیی ئەویان باشتر بۆ دەرکەوت.
هەر لە قسەکانیدا بافڵ هەڕەشەی ئەوەی کرد کە دەتوانێت ماڵ و دوکان و نەخۆشخانەکانی ئەندامانی پارتی لە سلێمانی بە بلدۆزەر تەخت بکات. ئەو چونکە لە ڕوانگەی ڕەفتاری خۆی و مافیاکەیەوە سەیری شتەکان دەکات، پێیوایە هەر خەیاڵێکی سەرخۆشی هەبێت دەتوانێت جێبەجێی بکات. هەر ئەوەیە وای لێ کردووە دژی حکوومەتێکی بەهێز و سەروەریی یاسا بێت. خەیاڵێک کە بە دڵنیاییەوە لە شکست زیاتر هیچ ئەنجامێکی بۆ پاڤێڵ و تاقمەکەی نابێت.
بافڵ لە پانێڵەكەدا دوور و نزیك بەلای ئەو هەموو نەهامەتی و تیرۆر و بڕین و تۆقاندنە نەڕۆیشت، كە لە سنووری ژێر دەسەڵاتی خۆی و كۆماندۆكەیدا لەئارادایە، هیچ باسی ئەو نانبڕین و تێكدانی ناوخۆی یەكێتی و دوورخستنەوەی تێكۆشەرانی ناو یەكیتی نەكرد، بۆ بینەرانی شی نەكردەوە كێن ئەوانەی سنووری سلێمانییان كردووەتە سەنتەری بازرگانی ماددەی هۆشبەر، ڕوونی نەكردەوە ئەو مافیاگەری و سەرانەسەندن و تێكدانی ژیانی خەڵك و سووتاندنی بازاڕەكان و شوێنی كەسابەت و كاری خەڵك چییە كە لەسەر دەستی چەكدار و مافیاكانی خۆی ئەنجام دراوە.
پاڤێڵ باسی دیارنەبوونی داهاتی کرد، بەڵام ئەوەی دیار نییە داهاتی سلێمانییە کە وەزیری داراییش نازانێت چەندە، لە بافڵ دەپرسین داهاتی نەوتی قاچاخی کەرکووک کە لەگەڵ میلیشیاکان دەیفرۆشن چەندە؟.. لە بافڵ دەپرسین ئێوە بە چ سیفەتێک دژایەتی پڕۆژەیەکی حکوومی وەك هەژماری من دەکەن، کە لەلایەن ئەنجومەنی وەزیران دەنگی لەسەر دراوە، تۆ چ پۆستێکی حکوومیت هەیە هەتا بڕیار لەسەر پڕۆژەکە و چارەنووسی خەڵك بدەیت؟ بافڵ نایەوێ بیبینێت ئەگینا خەڵكی كوردستان و كەوادیری یەكێتیش بۆیان ڕوون بووەتەوە ئەو دژایەتییەی ئەو بەرانبەر پڕۆژەی هەژماری من هەیەتی لەبەر ئەوەیە بافڵ و كۆماندۆ و چەكدارەكانی چیتر ناتوانن مووچەی خەڵك وەك چەك بەكار بێنن بۆ كڕینی وەلائی سیاسی، دەزانن هەژماری من كۆتایی بە نەریتی قێزەوه‌نی ترساندن و نانبڕین دەهێنێت كە ساڵانێكە مافیاكانی یەكێتی لەدژی كەوادیری خۆیان بەكاری دەهێنن. سرووشتیە كە بافڵ دژی هەژماری من بێت چونكە عەقڵیەتی مافیا هەرگیز نایەوێ خەڵك خاوەنی ماڵ و داهاتی خۆی بێت.
بافڵ باسی ئەو بەڵگەدەنگییە ئابڕووبەرەی خۆی و براكەشی كرد، كە لەكاتی بانگەشەدا بۆ ڕای گشتی خرایەڕوو، بافڵ خۆی باشتر لە هەموو كەس دەزانێت كە دەنگەكە هی خۆی و براكەیەتی، لەجیاتی قسەی زل، با ئەو شەهامەتەیان هەبێ بچن لە كام كۆمپانیای پسپۆڕ و كام دادگە هەیە تاقی بكەنەوە و سکاڵا بکەن، بەڵام خۆیان باش دەزانن چ کەتنێکیان کردووە و بەو قسانە پینە ناکرێت.
لە كۆتایی دا دەڵێین لەبەرانبەر ئەو تاکڕەوی و ئاژاوەگێڕی و تێكدان و مافیاگەری و موخەدرات و تیرۆر و تۆقاندن و چەواشەكاری و هەوڵدان بۆ بنبەستی سیاسییەی یەكێتیە نوێیەكەی بافڵ دەیەوێ بەسەر كوردستاندا بسەپێنێت، ستراتیژیی پارتی ڕوون و ئاشكرایە. ستراتیژی پارتی ئارامی و ئاوەدانی و پێکەوەیی و خۆڕاگری، یەك هەرێم، یەك پەرلەمان، یەك حكوومەت و یەك هێزی پێشمەرگەیە. ئەمە ستراتیژ و ئامانجی هەموو تاكێكی ئەم نیشتیمانە و ئامانجی هەموو تێكۆشەر و ئازادیخوازێكی كوردستانە. پارتی داکۆکیکار و مکوڕە لەسەر یەکخستنی هێزی پێشمەرگە تا چیدی گرووپی چەکدار لەژێر سایەی هەندێ لایەن بە ڕەفتاری مافیایی هەڵنەکوتنە سەر خەڵک و سێبەری قوڕسیان بەسەر شارێکدا نەسەپێنن. پارتی سەرەڕای ئەو پیلانگێڕیانەی دژی کرا بۆ سەپاندنی دیزاینێکی پێشوەختە، زۆرترین دەنگی دەنگدەرانی کوردستانی هێناوە و وەک گەورەترین حزب و خاوەنی زۆرترین کورسی، حکوومەت پێک دەهێنێت و بۆ ئەوەش دەرگای بۆ هەموو لایەنەکان کراوەیە، هەر كەس و لایەنێک بە خەیاڵی ڕێگرتن لەو ئامانجە پیرۆزانە بێت، شکستی گەورەتر چاوەڕێی دەکات، سەرکەوتنە گەورەکەی پارتی هانمان دەدات حکوومەتێکی بەهێز پێک بهێنین تا کۆتایی بە خۆسەپاندنی ئەوانە بێت کە لەجیاتی پڕۆژەی ئاواکاری، خەریکی دامەزراندنی کارگەی بەرهەمهێنان و ترانزێتی ماددەی هۆشبەرن.
سەرچاوەیەكی ڕۆژنامەوانی لە پارتی دیموكراتی كوردستان
30-10-2024
ئەم بابەتە 30 جار خوێندراوەتەوە