پەیامی کورد   ...   پشتڕاست کردنەوەی حوکمی لەسێدارەدانی بەندکراوێکی سیاسی لە دیوانی باڵای ڕێژیمی ئێران

لقی ٩ی دیوانی باڵای ڕێژیم حوکمی لەسێدارەدانی حەمید حسێن نژاد حەیدەرانلوو، بەندکراوی سیاسی کوردی خەڵكی گوندی "سگریک" سەر بە شاری چاڵدێرانی وەک خۆی پشتڕاست کردەوە.

بە ووتەی سەرچاوەیەکی ئاگادار ، ئەم حوکمە ڕۆژی ٦ی خاکەلێوەی ١٤٠٤، بە فەرمی لە بەندیخانەی ناوەندی ئۆرمیە بەم بەندکراوە سیاسییە ڕاگەێندراوە. 

گەلاوێژی ساڵی ١٤٠٣، ئەم بەندکراوە سیاسییە ناڕەزایەتی بە بڕیاری دادگای سەرەتایی دەربڕی و دۆسییەکەی بە مەبەستی پێڕاگەیشتنی دووبارە ڕادەستی لقی ٩ی دیوانی باڵای ووڵات کرابوو.

حەمید حسێ ننژاد حەیدەرانلوو، لەلایەن لقی یەکی دادگای ئینقلابی ئۆرمیە وە بە سەرۆکایەتی دادوەر "نەجەف زادە" بە تۆمەتی "بەغی" بە لەسێدارەدران سزا درا و کۆتاییەکانی مانگی پووشپەڕی ١٤٠٣، ئەم سزایە لەلایەن لقی یەکی دادگای ئینقلابی ئۆرمیەوە بە تۆمەتی "بەغی" لە ڕێگەی ئەندامەتی لە حیزبی کرێکارانی کوردستان  دەر کرابوو.

ئەم هاووڵاتییە ڕۆژی ٢٤ی خاکەلێوەی ١٤٠٢ لە سنووری چاڵدێران دەست بەسەر کرا و پاش چەند کاتژمێر لێپرسینەوە لە گرتنگەی سەر سنوورەوە بۆ گرتنگەی ئیتلاعاتی ورمێ ڕاگوێزرا.

حەمید حسێن نژاد حەیدەرانلوو بۆ ماوەی ١١ مانگ و ١٠ ڕۆژ لە گرتنگەی ئیتلاعاتی ورمێ بە مەبەستی وەرگرتنی دانپیدانانی زۆرەملێ لە پەیوەندی لەگەڵ بەشداری لە تێکهەڵچوونی چەکدارانی حیزبی کرێکارانی کوردستان لەگەڵ هێزە سنوورییەکان لەژێر ئەشکەنجەی جەستەیی و دەروونیدا بووە و بە زۆر ناچار بە واژووکردنی چەند بەڵگەیەک کراوە کە لێپرسە ئەمنییەتییەکان پێشتر ئامادەیان کردوون.

حەمید حسێن نژاد حەیدەرانلوو لە ماوەی دەست بەسەرکرانی دا لە گرتنگەی ئیتلاعاتی ورمێ تەنیا دوو جار پەیوەندی تەلەفۆنی کورتی لەگەڵ بنەماڵەکەی هەبووە و لە مافی دەست پێڕاگەیشتن بە پاریزەر بێبەری کراوە.

ئەم بەندکراوە سیاسییە ئێستا لە بەندی وەرگرتنی ٢ی بەندیخانەی ناوەندی ئۆرمیە یە.
حەمید حسێن نژاد حەیدەرانلوو لەدایکبووی ساڵی ١٣٦٤، باوکی سێ منداڵە و لە ماوەی ساڵانی ڕابردوودا بۆ دابینکردنی پێداویستییەکانی ژیانی خۆی لە سنووری چاڵدێران کاری کردووە.