پەیامی کورد    ...   پشتیوان سادق : پێشمەرگە سیمبولی بەرخودان و ئازایەتی و ژیاندۆستیە

لە دیدارێکدا بە ئامادەبوونی پشتیوان سادق، ئەندامی مەکتەبی سیاسی و بەرپرسی مەکتەبی ڕێکخستنی پارێزگای ھەولێر سیمینارێک سەبارەت بە ڕۆڵی پێشمەرگە لە بزاڤی بزوتنەوەی ڕزگاریخوازی گەلی کوردستان بەڕێوەچوو. 

سێشەممە ٢٥ی شوباتی ٢٠٢٥، بە ئامادەبوونی پشتیوان سادق و چیا ھەرکی یاریدەدەری بەرپرسی مەکتەب و ژمارەیەک لە بەرپرسانی حزبی و میری و سەربازی، پێشمەرگە و ھەڤاڵ و کادیرانی پارتی، سیمینارێک بە ناونیشانی (ڕۆڵی پێشمەرگە لە بزاڤی بزووتنەوەی ڕزگاریخوازی گەلی کورد، کە بووە مایەی سەرھەڵدان و ڕاپەرینی گەلەکەمان) لەلایەن ڕێکخراوی پشتیوانی پێشمەرگەی کوردستان، بۆ  پشتیوان سادق ڕێکخرا. 

لە سەرەتای سیمینارەکە، پشتیوان ئاماژەی بە مێژوو و خەباتی سەدان ساڵەی پێشمەرگە قارەمانەکانی کوردستان، لە قۆناغە جیاجیاکان کرد و، ڕۆڵ و کاریگەری گەورەی پێشمەرگەی بە ووردی باسکرد، کە لە سایەی فیداکاری پێشمەرگە و خوێنی ھەزاران شەھید، ئێستا خاوەن قەوارەییەکی دەستووری سەربەخۆین، بۆیە پێشمەرگە سیمبولی بەرخودان و ئازایەتی و ژیاندۆستیە.

ڕۆڵی گەورەی پێشمەرگە، لە بەرگریکردن لە خاک و خەڵک و نیشتیمان و بەرقرارکردنی ئاسایش و ئارامی و ھێمنی لە ھەرێمی کوردستان، تەوەرێکی تری سیمینارەکەی بەرپرسی مەکتەبی ڕێکخستنی ھەولێر بوو. 

لە کۆتایی سیمینارەکەدا، دکتۆر پشتیوان تیشکی خستەسەر دوایین پێشھات و بارودۆخ و گۆڕانکارییە سیاسیەکانی ناوخۆ و  عێراق و ناوچەکە.