پەیامی کورد   ...   "پڕۆژەی ڕووناکی لە پارێزگای دهۆک دەست پێ دەکات"

بەڕێوبەری گشتی کارەبای دهۆک ووتی "پڕۆژەی ڕووناکی پێدانی کارەبای ٢٤ کاتژمێری لە پارێزگای دهۆک دەکەوێتە بواری جێبەجێکردن، سەرەتاش لە سەنتەری قەزا دەست پێ دەکات، ئێستا تێستی کارەبای ٢٤ کاتژمێری دەکرێت بۆ ئەوەی دەست بە پڕۆژەکە بکرێت."

ئەندازیار شاکر مەحموود، بەڕێوبەری گشتی کارەبای دهۆک ، ڕایگەیاند "بۆ دەست پێکردنی پڕۆژەی ڕووناکی پێدانی کارەبای ٢٤ کاتژمێری، ئەمڕۆ دەست بە تێستی کارەبا کرا، کە سەنتەری پارێزگای دهۆک وەکوو قۆناغی یەکەم کارەبای ٢٤ کاتژمێری بۆ ماوەی ٧٢ کاتژمێر پێ دەدرێت، بۆ ئەوەی بزانن تۆڕی کارەبا چەند توانای هەیە و لە کوێ گرفت هەیە، بۆ ئەوەی کە پڕۆژەکە جێبەجێ کرا هیچ گرفتێکی کارەبا بۆ خەڵک درووست نەبێت."

ئەندازیار شاکر مەحمود ووتیشی "دوای سەنتەری پارێزگای دهۆک لە قەزا و ناحیەکانیش کارەبا تێست دەکرێت وەکوو قۆناغی دووەم و سێیەم، بزانین چەند توانایان هەیە بۆ کارەبای ٢٤ کاتژمێری، لە هەر شوێنێک گرفت هەبێت چارەسەر دەکرێت."