ڕاگەێندراوێك لە سەرۆكایەتی هەرێمی كوردستان ەوه
پەیامی کورد ... ڕاگەێندراوێك لە سەرۆكایەتی هەرێمی كوردستان ەوه
سەرۆکایەتی هەرێمی کوردستان ڕایگەیاند : هیچ جۆرە پێشێلكارى و بێ ڕێزییه‌ك به‌رامبه‌ر به هه‌ر بیر و بڕوا و ئایینێك، قبووڵ كراو نییە و سەركۆنەی دەكەین.
ده‌قی ڕاگەێندراوه‌كه‌ی سەرۆكایەتی هەرێمی كوردستان:
ماوه‌ى چه‌ند ڕۆژى ڕابردوو كاردانه‌وه‌یه‌كى فراوان به‌تایبه‌تى له تۆڕه کۆمه‌ڵایه‌تییه‌کاندا به‌رامبه‌ر به لێدوانێکی نادروستی كه‌سایه‌تییه‌كى ئێزدى هاته ئاراوه. لێره‌دا جه‌خت ده‌كه‌ینه‌وه كه هیچ جۆرە پێشێلكارى و بێڕێزییه‌ك به‌رامبه‌ر به هه‌ر بیر و بڕوا و ئایینێك، قبووڵ كراو نییە و سەركۆنەی دەكەین.
لە هەمانكاتدا هه‌ڵه‌ى كه‌سێك له هه‌ر ئایینێك بێت، نابێ به هه‌ڵه‌ى هه‌موو په‌یڕه‌وانى ئایینه‌كه له قه‌ڵه‌م بدرێت، بۆیه ده‌بێ هەموو لایەك پابەندی كولتووری یەكترقبووڵكردن و لێبوردەیی و پێكەوەژیان بن و ڕێگە لە درووستبوونی ووتاری ڕق و كینە و نكۆڵی كردن بگیرێت.
لایەنە پەیوەندیدارەكان بەرپرسن لە بەدواداچوون و لێپرسینەوەی یاسایی، هەموو لایەكیش دڵنیا دەكەینه‌وه كە هەرێمی كوردستان بۆ هەمیشە وەك نموونەی پێكەوەژیانی ئاشتیانە و برایەتی دەمێنێتەوە. هیچ پاساوێك بۆ نانەوەی ئاڵۆزی و پشێوی و درووستكردنی هەڕەشە بۆ سەر هاووڵاتیان و پێكهاتە ئایینی و نەتەوەیییەكانی كوردستان قبووڵ ناكرێت.
سەرۆكایەتی هەرێمی كوردستان
2024/8/9
ئەم بابەتە 12290 جار خوێندراوەتەوە