ژماره‌یه‌ك پڕۆژه‌ی ستراتیژی له زاخۆ جێبه‌جێ ده‌كرێن
پەیامی کورد ... ژماره‌یه‌ك پڕۆژه‌ی ستراتیژی له زاخۆ جێبه‌جێ ده‌كرێن
له ئیداره‌ی سه‌ربه‌خۆی زاخۆ ژماره‌یه‌ك پڕۆژه‌ی ستراتیژی ده‌چنه بواری جێبەجێكردن، به‌ڕێوبه‌ری گشتی وه‌به‌رهێنانی زاخۆش ده‌ڵێ: پڕۆژه‌كان كاریگه‌ریان له‌سه‌ر ده‌رفه‌تی كار ده‌بێت.
جگه‌رخوێن تاهر، به‌ڕێوبه‌ری گشتی وه‌به‌رهێنانی زاخۆ ڕایگه‌یاند : ژماره‌یه‌ك پڕۆژه‌ی ستراتیژی له ئیداره‌ی سه‌ربه‌خۆی زاخۆ جێبه‌جێ ده‌كرێن کە پڕۆژه‌ی زۆر ستراتیژین و كاریگه‌رییان له‌سه‌ر بووژانه‌ی ئیداره‌كه ده‌بێت، له سنووری ناحیه‌ی ڕزگاری دوو پڕۆژه جێبه‌جێ ده‌كرێن، ئه‌وانیش درووستكردنی كارگه‌یه‌كی به‌رهه‌مهێنانی شه‌كر و پاڵاوگه‌یه‌كی نه‌وتن.
به‌ڕێوبه‌ری گشتی وه‌به‌رهێنانی زاخۆ ووتی : هه‌ر لە زاخۆ دوو وێستگه‌ی كارۆ ئاوی جێبه‌جێ ده‌كرێن كه توانای به‌رهه‌مهێنانی 100 مێگاوات كاره‌بایان هه‌یه، هه‌روه‌ها كۆمه‌ڵێك پڕۆژه‌ی گه‌شتیاری ناوازه له‌سه‌ر ڕێگای سه‌ره‌كی (زاخۆ- دهۆك) جێبه‌جێ ده‌كرێن، چه‌ندین پڕۆژه‌ی دیكه‌یش بۆ ئیداره‌ی سه‌ربه‌خۆی زاخۆ بەڕێگاوەن.
جگه‌رخوێن تاهر ئاماژه‌ی بۆ ئه‌وه كرد: دوای ته‌واوبوونی ئه‌و پڕۆژانه و چه‌ندان پڕۆژه‌ی دیكه كه ئێستا كاریان تێدا ده‌كرێت كاریگه‌رییان له‌سه‌ر گه‌شه‌كردنی ئیداره‌كه‌مان ده‌بێت، له‌وانه، په‌یداكردنی هه‌لی كار و پڕكردنه‌وه‌ی بازاڕی ناوخۆ و راكێشانی گه‌شتیاری زیاتر بۆ زاخۆ.
ئەم بابەتە 46856 جار خوێندراوەتەوە