YE daxwaza agirbesteke giştî û "Hurmuza azad" dike

PeyamaKurd - Ursula von der Leyen ragihand ku Yekîtiya Ewropayê (YE) bi hemû hêza xwe ya dîplomatîk hewl dide daku agirbestek li Îran û Lubnanê pêk were. Von der Leyen destnîşan kir ku tenê agirbest têrê nake; divê ev agirbest bibe bingehek ji bo azadiya temam a keştîvaniyê li Tengava Hurmuzê.

Seroka Komîsyona Ewropayê tekez kir ku her peymaneke aştiyê ya di pêşerojê de, divê bibe garantiyek daku tu bac an xercên neqanûnî li ser keştiyên bazirganî neyên sepandin. Bi vî awayî, YE dixwaze herikîna enerjiyê û bazirganiya cîhanî ji bin bandora şer rizgar bike.

"Nukleer û moşekên balîstîk xetên sor in"

Von der Leyen di daxuyaniya xwe de şertên Ewropayê yên ji bo aştiyeke mayînde jî rêz kirin. Wê diyar kir ku her peymanek divê bernameya atomî ya Îranê û sîstema moşekên balîstîk jî li xwe bigire daku ewlehiya navneteweyî were parastin.

 Seroka Komîsyona Ewropayê hişyarî da ku berdewamiya şerê li Rojhilata Navîn rasterast ewlehiya aborî ya parzemîna Ewropayê dixe metirsiyê. Ji ber vê yekê, wê bang kir ku Ewropa bibe xwedî çavkaniyên enerjiyê yên serbixwe û aram daku di krîzên bi vê rengî de aboriya welatên endam neheje.