IEA: Şerê Îranê dibe sedema kêmbûna 120 milyar m³ gaza LNG

PeyamaKurd - Ajansa Navneteweyî ya Enerjiyê (IEA) hişyarî da ku şerê berdewam ê li dijî Îranê, bandoreke kûr û demdirêj li ser bazara gaza xwezayî ya cîhanî dike. Li gorî daxuyaniya herî dawî, tê pêşbînîkirin ku di navbera salên 2026 û 2030î de, cîhan ji ber vî şerî nêzîkî 120 milyar metreyên sêcarkî gaza xwezayî ya şilkirî (LNG) ji dest bide.

Kêmasiya dabînkirinê û asoyên bazarê

Şirovekerê IEAyê Gergely Molnar, di "Lûtkeya LNG ya Budapestê" de diyar kir ku şerê di navbera Amerîka-Îsraîl û Îranê de hemû hesabên bazara gazê serûbin kirine. Molnar destnîşan kir ku kêmiya dabînkirina gazê di bazaran de dê ji texmînên berê gelekî dirêjtir bikişîne. Ev rewş ji ber sistbûna şiyana berhemanînê û zextên li ser zincîreyên dabînkirinê derketiye holê, ku asoyên bazara cîhanî ya gazê ber bi nezelaliyekê ve birine.

Krîza li Tengava Hurmizê

Ji dema destpêkirina şer di 28ê Sibata 2026an de, Tengava Hurmizê ya ku wekî "şahdemara" enerjiyê tê naskirin, rastî aloziyeke bêmînak hatiye. Ji ber ku ev rêya sereke ya veguhastina petrol û gazê ye, nebûna ewlehiyê li vê tengavê rasterast bandorê li bihayên enerjiyê li seranserê cîhanê dike. IEA balê dikişîne ku ev rewşa krîtîk dê di dema navîn de bibe sedema guherînên stratejîk di bazirganiya gaza navdewletî de.