Îstixbarata Amerîkî: Hebûna artêsa Çînê li baregeheke Îmaratê hat tesbîtkirin

PeyamaKurd – Karbidestên parastin û îstixbarata Dewletên Yekbûyî yên Amerîkayê (DYA) ragihandin ku yekîneyên Artêşa Rizgariya Gel a Çînê (PLA) li baregeheke leşkerî ya Îmaratên Erebî yên Yekbûyî (ÎEY) bi cih bûne. Ev pêşhat, li Washingtonê bûye sedema fikarên cidî yên ewlehiyê.

Li gorî agahiyên ku rayedarên Amerîkî dane, leşkerên Çînî li "Bajarê Leşkerî yê Zayed" hatine dîtin. Gumanên îstixbarata Amerîkî piştî wê yekê zêde bûn ku rayedarên Îmaratê destûr nedan heyetên Amerîkî ku bikevin beşeke taybet a vê baregehê û kontrolê bikin.

Baregeha ku behsa wê tê kirin, tenê 20 kîlometre dûrî Baregeha Hewayî ya El-Dehfra ye, ku navenda serekî ya 380emîn Hêza Hewayî ya Amerîkayê ye li herêmê. Washington bi fikar e ku personelên leşkerî yên Çînî bikaribin alavên teknîkî û radaran bikar bînin da ku sîxuriyê li ser tevgerên leşkerî û teknolojiya Amerîkayê bikin.

Têkiliyên leşkerî û teknolojîk ên di navbera Ebû Dabî û Pekînê de di salên dawî de balê dikişînin:

Belgeyên îstixbaratî nîşan didin ku tevî hişyariyên Amerîkayê, Çîn xebatên avakirina bendereke leşkerî li Îmaratê bi awayekî veşartî didomîne.

Hat  eşkerekirin ku şîrketa îstixbarata sûnî ya Îmaratê, G42, hevkariyê bi şîrketa Huawei û artêşa Çînê re kiriye da ku kapasîteya mûşekên Çînî pêş bixe.

Ev nêzîkbûna bi Çînê re, rasterast bandor li peymanên çekan ên di navbera DYA û Îmaratê de kiriye. Rêveberiya Biden, ji ber metirsiya ku teknolojiya pêşketî bikeve destê Çînê, pêvajoya firotina balafirên şer ên F-35 bo Îmaratê cemidandiye. Rayedarên Amerîkî hişyarî didin ku heke Îmarat hevkariya xwe ya leşkerî bi Çînê re sînordar neke, dibe ku hevkariya stratejîk a bi Amerîkayê re zirarê bibîne.