Senatorê Amerîkî hişyarî da: Artêşa Sûriyeyê radîkal dibe, daxwaza Îsraîlê mafdar e

PeyamaKurd – Senatorê payebilind ê Komarî Lindsey Graham, derbarê rewşa ewlehiyê ya li Sûriyeyê de hişyariyên cidî dan û piştgirî da daxwaza Îsraîlê ya ji bo avakirina "herêmeke ewle" li başûrê wî welatî.

Graham bal kişand ser metirsiya radîkalbûna hêzên ewlehiyê yên hikûmeta nû û destnîşan kir ku divê kêmneteweyên wekî Durziyan werin parastin.

Graham ev daxuyanî piştî belavbûna dîmenên merasîmeke leşkerî li Şamê da. Di wan dîmenan de ku Serokê Demkî yê Sûriyê Ehmed el-Şara jî amade bû, leşkeran dirûşmeyên tund ên li dijî Îsraîlê berz dikirin. Senatorê Amerîkî got,

Ev delîl nîşan didin ku radîkalîzma di nav hêzên ewlehiyê de ji ya ku tê xeyalkirin kûrtir e. Divê Amerîka piştgiriya xwe ya ji bo hikûmeta veguhêz bi çavên vekirî û bi hişyarî bimeşîne."

Senator Graham diyar kir ku ew daxwaza Îsraîlê ya ji bo herêmeke tampon mafdar dibîne. Li gorî wî, ev gav ne tenê ji bo parastina sînorên Îsraîlê, di heman demê de ji bo parastina civaka Durzî ya ku li herêmên Suweyda û derdora wê di bin gefê de ne, pêwîst e.

Li aliyê din, piştî belavbûna dîmenên navborî, Wezîrê Karûbarên Diyasporayê yê Îsraîlê Amichai Chikli jî bertek nîşan da û hişyarî da ku heke rewş wiha bidome, "şer neçar e". Piştî hilweşîna rejîma Esed, rewşa Sûriyeyê hîn jî aloz e û kêmneteweyên li başûrê welêt daxwaza garantiyên navneteweyî dikin.