Trump gefên tund li DAIŞê xwar: “Hûn ê ji her demê bêtir rastî lêdanan werin”

PeyamaKurd – Serokê Amerîkayê Donald Trump, li ser platforma xwe ya medyaya civakî Truth Socialê peyameke tund weşand û hûrgiliyên operasyona "Hawkeye Strike" ya li dijî DAIŞê parve kirin. Trump hişyarî da terorîstan û got ku her êrîşeke li dijî Amerîkayê dê bi bersiveke "pir bihêz" re rûbirû bibe.

Serok Trump di daxuyaniya xwe de tekez kir ku operasyona heyî wekî bersivek li ser êrîşa 13ê Kanûnê hatiye destpêkirin û wiha got: "Ez hemû terorîstên ku têra xwe xerab in ku êrîşî Amerîkiyan bikin hişyar dikim. Ger hûn êrîşî Dewletên Yekbûyî yên Amerîkayê bikin an jî gefê li wan bixwin, hûn ê ji her demê bêtir rastî lêdanan werin."

Xala herî balkêş a daxuyaniya Trump, pesnê wî yê ji bo hikûmeta Sûriyeyê (Şam) bû. Trump diyar kir ku rêveberiya Şamê di operasyonên li dijî DAIŞê de piştgiriyê dide Amerîkayê û got: "Hikûmeta Sûriyeyê, bi serokatiya rêberekî ku ji bo vegerandina welêt ji nû ve mezin dixebite, di vê pêvajoyê de bi tevahî piştgiriyê dide me."

Di 13ê Kanûna 2025an de, li nêzîkî bajarê Palmîrayê (Tedmûr) çekdarên DAIŞê kemînek li ber hêzên Amerîkî danîbûn. Di wê êrîşê de du leşkerên Amerîkî û peymankarekî sivîl jiyana xwe ji dest dabûn. Piştî vê bûyerê, Amerîkayê bi navê "Operasyona Hawkeye" pêleke berfireh a êrîşên hewayî û mûşekî li seranserê Sûriyeyê da destpêkirin.

Trump bi vê daxuyaniyê peyam da ku stratejiya wî ya li Sûriyeyê, li ser bingeha "tolhildana tund" û hevkariya bi hêzên herêmî re ava dibe.