Mezlûm Ebdî: Sala 2026an dê ji bo HSDyê bibe destpêka serdemeke nû

PeyamaKurd – Fermandarê Giştî yê Hêzên Sûriyeya Demokratîk (HSD) Mezlûm Ebdî, derbarê nîqaşên li ser entegrebûna hêzên wan di nav artêşa Sûriyeyê de daxuyaniyeke girîng da. Ebdî îdiayên ku dibêjin "HSD ber bi dawiyê ve diçe" red kirin û destnîşan kir ku ew dikevin qonaxeke nû.

Mezlûm Ebdî di hevpeyvîneke televîzyonî de diyar kir ku hin derdor hewl didin peymana 10ê Adarê wekî "dawiya QSDê" nîşan bidin. Ebdî got:

Ji bo me, dawiya vê salê ne dawiyek e, lê destpêkek e. Sala 2026an dê bibe destpêka serdemeke nû ku em ê tê de gavên girîngtir ji bo xizmeta gelê xwe û xurtkirina hebûna xwe bavêjin."

Li gorî agahiyên dawî, hikûmeta Şamê pêşniyareke nivîskî pêşkêşî HSDyê kiriye. Di vê pêşniyarê de tê xwestin ku HSD bi sê tugayan û hin yekîneyên din tevlî artêşa Sûriyeyê bibe. Tê payîn ku ji bo nîqaşkirina hûrguliyên vê pêşniyarê, şandeyeke HSDyê di demeke nêz de serdana Şamê bike.

Tevî geşbîniya di daxuyaniyan de, çavkaniyên siyasî diyar dikin ku di navbera her du aliyan de nakokiyên kûr hene. HSD naxwaze destkeftiyên Rêveberiya Xweser û modela nenavendî ji dest bide, lê Şam israr dike ku hemû hêzên çekdar di bin kontrola hikûmeta navendî de bin.

Hinek dîplomatên Rojavayî bawer dikin ku ev daxuyaniyên her du aliyan zêdetir ji bo "parastina aramiyê" û "dem qezenckirinê" ne. Tê gotin ku heta li ser statuya siyasî ya Rojavayê Kurdistanê lihevkirinek neyê kirin, entegrasyoneke leşkerî ya rasteqîn zehmet xuya dike.