Biden: Em destwerdana karûbarên navxweyî yên Îsraîlê nakin

PeyamaKurd – Serokê Amerîkayê Joe Biden, îdiayên ku dibêjin ew destwerdana karên navxweyî yên Îsraîlê dikin red kirin û got, "Em destwerdanê nakin. Di vê mijarê de helwesta min dizanin."

Biden di vegera ji bernameya xwe ya li eyaleta Karolînaya Bakur, li Durhamê dema ku li balafirê siwar bû û piştî daketinê li Qesra Spî bersiv da pirsên rojnamevanan.

Biden li ser pirsa gelo ew ji demokrasiya Îsraîlê ya ku ji ber nîqaşên reforma dadrêsî bû qada xwepêşandanan bi fikar e yan na wiha bersiv da, "Mîna gelek alîgirên bihêz ên Îsraîlê ez jî pir bi fikar im."

Biden bi nêrîna ku Îsraîl di pêvajoyeke dijwar re derbas dibe û divê pê re mijûl bibin got, ew hêvî dike Serokwezîrê Îsraîlê Benjamin Netanyahu dev ji rêkeftina reforma dadwerî berde.

Biden got, "Ew nikarin li ser vê rêyê bidomînin. Min bi awayekî eşkere ev yek eşkere kir" û got, ew hêvî dike Netanyahu bi rengekî ku lihevhatinek rast peyda bike tevbigere.

Li ser pirsa gelo ew ê Netanyahu vexwîne Washingtonê, Biden bersiv da, "Na, ne zû." Biden got, wî bi telefonê bi Netanyahu re neaxiviye, lê bi rêya balyozê welatê xwe yê li Îsraîlê peyama xwe gihandiye wî.

Biden, derbarê axaftinên li ser destwerdana Amerîkayê ya li karên navxweyî yên Îsraîlê da wiha got: "Em destwerdanê nakin. Di vê mijarê de helwesta min dizanin. Helwesta Amerîkayê jî dizanin. Helwesta cihûyên Amerîkayê jî dizanin."

Biden têkildarî plana Rûsyayê ya ji bo bicihkirina çekên nukleerî yên taktîkî li Belarûsê got, "Heta niha ev yek nekiriye. Ev celeb axaftineke xeternak e ku ew (Serokê Rûsyayê Vladîmîr Pûtîn) dike, û ew metirsîdar e."