Hesekê: Şêniyên Şedadê li dijî xizanî û kêmbûna xizmetê rabûn ser piyan

PeyamaKurd - Xelkê bajarokê El Etaleyê ku bi ser bajarê Şedadê yê parêzgeha Hesekê ve ye, ji ber xerabûna rewşa jiyanê, gûrbûna xizaniyê û kêmbûna xizmetguzariyên sereke çalakiyeke berfireh a nerazîbûnê li dar xist.

Şêniyên herêmê di vê xwepêşandanê de dengê xwe li dijî bihabûna zêde ya kelûpelên xwarinê, bilindbûna rêjeya bêkariyê di nav ciwanan de, qutbûna av û elektrîkê û her weha rewşa lawaz a navendên tenduristiyê bilind kirin.

Beşdarên çalakiyê bi daxuyaniyên tund daxwaz kirin ku aliyên berpirsiyar demildest rewşa debarê baştir bikin û pêdiviyên herî bingehîn ên jiyanê ji bo gund û bajarokan dabîn bikin daku ev krîza giran a ku li ser pişta gel bûye bar nebe sedema aloziyên mezintir.

Di dema xwepêşandanê de, çalakvanan û şêniyên navçeyê bal kişandin ser xaleke pir krîtîk û diyar kirin ku piştî derbasbûna hikûmeta demkî ya herêmê, asta xizmetguzariyên giştî li şûna ku pêş bikeve, pir paş de çûye û herêm raste rû bi rûyî paşguhkirineke polîtîk û îdarî bûye.

Ev çalakiya ku herêm xistiye bin bandora xwe, ji bo rêveberiya nû wekî hişyariyeke herî giran a gel di warê birêvebiriya aborî û civakî de hat tomarkirin.