Maduro li New Yorkê derket pêş dadwer: "Ez hîn jî Serokê rewa me"

PeyamaKurd – Nicolas Maduro, ku di operasyoneke dawî ya li Venezuelayê de ji aliyê Amerîkayê ve hate girtin û anîn New Yorkê, doh cara yekem derket pêş dadwer.

Di rûniştina dadgeha federal de, Maduro sûcdariyên narkotîk-terorîzmê yên li dijî wî red kir û got, "Ez hîn jî serokê rewa me."

Çar tawanên giran, yek bersiv: Ez bêguneh im

Di rûniştina ku di bin ewlehiya tund de li Dadgeha Federal a New Yorkê hate lidarxistin de, Maduro yê 63 salî bi narkotîk-terorîzmê, komploya qaçaxçîtiya kokainê û hebûna çekên giran hate tawanbarkirin.

Bi rêya wergêrê xwe ji dadgehê re axivî û got, "Ez sûcdar nînim, ez dewletmedarekî rêzdar im. Dema min wekî serokê welatê min berdewam dike", û bi awayekî nerasterast dadweriya dadgehê û Amerîkayê red kir.

Jina wî Cilia Flores jî bêgunehiya wî parast

Jina wî, Cilia Flores, ku bi Maduro re hate girtin, jî di rûniştinê de amade bû. Flores diyar kir ku tohmetên li dijî wî bê bingeh in û ew bêguneh e.

Dadgehê biryar da ku rûniştina din a dozê di 17ê Adara 2026an de were lidarxistin.

Îdiaya "Hevkariya Kartelê"

Di îdianameya ku ji hêla Ofîsa Dozgeriya Dewletên Yekbûyî ve hatiye amadekirin de, Maduro bi avakirina toreke kokainê ya cîhanî bi kartelên navdar ên Sinaloa û Zetas ên Meksîkayê, serhildêrên FARC ên Kolombiyayê û çeteya Tren de Aragua tê tawanbarkirin.

Îdianame îdia dike ku vê toreyê ton madeyên hişbir bi qaçaxî birine Dewletên Yekbûyî.

"Lîstikek ji bo rezervên petrolê hatiye amadekirin"

Daxuyaniyên ji çavkaniyên alîgirê Maduro berî û piştî rûniştinê tekez kirin ku darizandin siyasî bû, ne qanûnî bû.

Li gorî The New York Times, Maduro dema ku ji salona dadgehê derket got, "Ez dîlê şer im."

Madoro di dadgehê de ji hêla Barry Pollack, parêzerê damezrînerê Wikileaks Julian Assange ve tê temsîlkirin.