Vance: Ger Îran ne cidî be, bêhna Trump ne fireh e

PeyamaKurd - Cîgirê Serokê Amerîkayê James David Vance, derbarê agirbesta bi Îranê re peyamên tund dan û diyar kir ku Amerîka ji bo aştiyê derfetek daye Tehranê.

Vance destnîşan kir ku armanca Serok Trump a serbazî anku lawazkirina şiyana şer a artêşa Îranê, bi serkeftî pêk hatiye û niha dor hatiye dîplomasiyê. Vance hişyarî da û got: "Heke Îranî bi dilxwazî û bi niyeta baş muzakere nekin, ew ê bibînin ku Serokê Amerîkayê ne kesekî wisa ye ku henekan hilde. Ew di mijara pêşveçûnê de ne bêhnfireh e."

Agirbesteke nazik û şertên Amerîkayê

Vance bal kişand ser "agirbesta nazik" a ku niha di navberê de heye û ragihand ku şertê wan ê sereke vekirina tengavan û rawestandina rehîngirtina aboriya cîhanê ye.

Cîgirê Serokê Amerîkayê diyar kir ku hinek alî di nav pergala Îranê de derbarê serkeftinên serbazî yên Amerîkayê û naveroka peymanê de derewan dikin û got, lê heke Tehran naxwaze careke din bibe armanca zextên aborî, dîplomatîk û serbazî, divê li ser maseya muzakereyê bi dirustî tevbigere.

Zextên aborî û hêza Trump

Cîgirê Serokê Amerîkayê James David Vance di axaftina xwe ya li Macarîstanê de tekez kir ku Serok Trump ferman daye ku ji bo niha amûrên serbazî neyên bikaranîn û rê ji dîplomasiyê re were vekirin. Lê belê, Vance dubare kir ku heke Îran hîle an jî xapandinê bike, Amerîka dê hemû hêza xwe ya aborî û serbazî ya mayî li dijî wan bi kar bîne.