Mesrûr Barzanî: Pistî êrîsa Kormorê hinardeya elektrîka Kurdistanê ji nû ve dest pê dike

PeyamaKurd- Serokwezîrê Herêma Kurdistanê Mesrûr Barzanî ragihand ku ew ligel şîrketa Dana Gasê gihiştine rêkeftinekê da ku hilberîna li Zeviya Kormorê dest pê bike û di çend demjimêrên bê de elektrîk vegere.

Mesrûr Barzanî got, “Ev êrîşa 11emîn a li kêlgehê û nabe bibe bûyereke asayî.”

Serokwezîrê Herêma Kurdistanê Mesrûr Barzanî diyar kir, piştî amadekariyên teknîkî, wan ligel şîrketa Dana Gasê li hev kiriye ji bo destpêkirina hilberînê.

Mesrûr Barzanî herwiha spasiya xelkê Kurdistanê jî kir ji bo bêhnfirehiya wan a li hemberî wê kêmbûna elektrîkê ku ji ber êrîşê çêbûye.

Serokwezîr Barzanî tekez kir ku êrîş li dijî berjewendiya hemû welatiyan e û li Herêma Kurdistanê û Iraqê bûye sedema qutbûna elektrîka bi milyonan kesan.

Mesrûr Barzanî piştrast kir ku ew li gel hikûmeta federal hemû hewlan didin ji bo cezakirina encamderan û rêgirtina li dubarebûna van êrîşan.

Di beşeke din a peyama xwe de, Mesrûr Barzanî eşkere kir ku ew li gel Serokwezîrê Iraqê Mihemed Şiya Sûdanî axiviye û jê re gotiye: “Divê encamderên vê êrîşê her alî û grûp bin û li her kû derê bin, lêpirsîn li gel wan bê kirin û radestî dadgehê bên kirin.”

Mesrûr Barzanî hişyarî da ku Iraq nikare veberhênana biyanî bikişîne “di demekê de milîs û komên çekdar ên ji yasayê derketî û mafyayên gendel bêyî ti ceza û lêpirsînê, êrîşî binesaziya aborî ya welat bikin.”

Di dawiyê de Barzanî got: "Ev êrîşên tirsonek me ji başkirina jiyana welatiyan ranawestînin û em dê di karwanê pêşketinê de bidomin."