Trump ji bo "Peymana Sûriye û HSD" spasiya Mesûd Barzanî kir

PeyamaKurd – Berpirsê Balyozxaneya Amerîkayê li Bexdayê Josh Harris, li ser navê Serokê Amerîkayê Donald Trump û rêveberiya wî, spasî û rêzgirtina xwe ji Serok Mesûd Barzanî re ji bo hemû piştgirî û beşdariyên wî yên di peymana dawî ya di navbera Hikûmeta Sûriyeyê û Hêzên Sûriyeya Demokratîk (HSD) de anî ziman.

Li gorî daxuyaniyek ji ofîsa Barzanî, Serok Mesûd Barzanî îro li Pîrmamê pêşwazî li Berpirsê Balyozxaneya Amerîkayê Harris û Balyoza Giştî ya Amerîkayê li Hewlêrê Wendy Green kir.

Di hevdîtinê de, Berpirsê Balyozxaneya Amerîkayê, li ser navê Serokê Amerîkayê û rêveberiya wî, spasî û rêzgirtina xwe ji Serok Barzanî re ji bo beşdarbûn û piştgiriya wî ya di peymana dawî ya di navbera Hikûmeta Sûriyeyê û HSD de ragihand.

Di hevdîtinê de, ku pêvajoya siyasî ya li Iraqê jî hate nîqaşkirin, aliyê Amerîkî piştgirî û helwesta xwe ya ji bo Herêma Kurdistanê ya bihêz di çarçoveya yekparçeyiya Iraqê de dubare kir.

Serok Barzanî piştgirî, rol û helwesta Amerîkayê ya li hember gelê Kurd pesnê xwe da û got, "Eger helwest û piştgiriya Amerîkayê ya sala 1991an nebûya, me nedikarî destkeftiyên wekî Raperîn (Serhildan), Parlamento û Hikûmeta Herêma Kurdistanê biparêzin."

Di civînê de danûstandineke berfireh a nêrînan li ser pêvajoya siyasî ya Iraqê hat kirin û girîngiya pabendbûna bi destûrê re hat tekez kirin.

Her du alî li hev kirin ku divê Iraqî bi xwe li ser bingeha hevkarî, hevsengî û lihevkirinê biryarên li ser pêşeroja welatê xwe bidin.

Di vê çarçoveyê de, her du aliyan kêfxweşiya xwe ji civîn û şêwirmendiyên vê dawiyê yên li Bexdayê nîşan dan ku armanc ew e ku nexşeyên rêyên siyasî yên ku berjewendiyên Iraqiyan diparêzin û hevkariya Amerîka-Iraqê di hemû waran de xurt dikin biafirînin.