Xortekî 18 salî li Diyarbekirê dayik û birayê xwe kust

PeyamaKurd – Bûyereke trajîk îro li navçeya Baxlarê ya navenda Diyarbekirê rû da, ku tê de xortekî 18 salî yê bi navê E.T., dayik û birayê xwe bi guleyan qetil kir. 

Hat ragihandin ku bûyer piştî nîvro derket holê, dema ku bavê malbatê, yê ku ji ber kar li Enqerê bû, nikarîbû xwe bigihîne malbata xwe ya li qata jorîn a avahiyek li ser Bûlvara Tûrgût Ozalê. Bavê dilgiran rewş ji xizmên xwe re ragihand.

Xizmên ku berê xwe dan navnîşana malbatê, E.T. yê 18 salî bi tifingek di destê wî de li Parka Koşûyolûyê dîtin. Li ser vê yekê, yekser polîs û tîmên Tenduristiya Bilez a 112 hatin agahdarkirin û berê xwe dan cihê bûyerê û parkê.

Dema ku tîmên polîs û tenduristiyê ketin malê, rastî dîmeneke hovane hatin. Dayik Îlknûr T.yê (52) û kurê wê Onûr T. (26) di nav nivînên wan de mirî hatin dîtin, û di muayeneya destpêkê de hat diyarkirin ku gule li serê wan hatine reşandin. Tîmên bijîşkî piştrast kirin ku dayik û kurê wê li cihê bûyerê jiyana xwe ji dest dane. Cenazeyên wan ji bo otopsiyê birin Saziya Tiba Edlî ya Diyarbekirê.

Di heman demê de, tîmên polîsan ên ku berê xwe dabûn Parka Koşûyolûyê, E.T. yê gumanbar girtin. Hat ragihandin ku E.T. hewl daye bi heman tifingê xwe bikuje, lê berî ku bigihîje armanca xwe, ji aliyê polîsan ve hatiye bêbandorkirin û girtin.

Lêpirsîna E.T. li navenda polîsan berdewam dike û hê bendewarî ew e ku di rojên pêş de bêtir agahî derbarê sedema vê komkujiya malbatî de derkevin holê.