Berî serdana Sera ya Washingtonê, peyama Amerîkayê zelal e: Em ji Rojavayê Kurdistanê venakisin
PeyamaKurd – Di demekê de ku amadekariyên ji bo serdana Serokê Demkî yê Sûriyê Ehmed Şera ya Washingtonê tên kirin, karbidestekî payebilind ê Amerîkayê helwesta welatê xwe ya li ser hebûna leşkerî li Rojavayê Kurdistanê û Sûriyê bi awayekî eşkere ragihand. Karbidest tekez kir ku Amerîka di vê qonaxê de tu planeke ji bo vekişandina hêzên xwe ji Rojavayê Kurdistanê yan jî ji baregeha stratejîk a El-Tenefê nake.
Ev daxuyanî weke danîna "xetên sor" ji aliyê Washingtonê ve beriya destpêkirina danûstandinên fermî bi rêveberiya nû ya Şamê re tê şîrovekirin.
Pêşîniya Sereke: Têkoşîna li dijî DAIŞê
Li gorî daxuyaniya karbidestê Amerîkayê, armanca bingehîn a hebûna leşkerî ya Amerîkayê li Rojavayê Kurdistanê û Sûriyê, misogerkirina têkçûna mayînde ya rêxistina DAIŞê ye. "Pêşîniya Washingtonê ew e ku pêşî li ji nû ve derketina DAIŞê bigire û rê li ber wê bigire ku rêxistin careke din bibe gefek ji bo Dewletên Yekbûyî," karbidest got. Wî herwiha îşaret bi modela hevkariya li Herêma Kurdistanê û Iraqê kir û got, "Em dixwazin bi hêzên hikûmetê yên li Sûriyê re bi heman hevrêziyê bixebitin, wekî ku me li Iraqê kir."
Karbidest piştrast kir ku operasyonên li dijî şaneyên DAIŞê di hefteyên dawî de bi serkeftî hatine meşandin û di encamê de hejmareke endamên rêxistinê hatine kuştin an jî girtin û ev operasyon dê berdewam bikin.
Lîsteya daxwazên Amerîkayê
Serdana Ehmed Şera bo Washingtonê weke hewldanek ji bo destpêkirina "pêvajoyeke hevkariyê ya nû" tê dîtin. Lê belê, Amerîka ji bo normalîzekirina têkiliyan xwedî lîsteyeke daxwazan e. Di nav van daxwazan de hevkariya di şerê li dijî terorê de, kontrolkirina kampên girtiyan, radestkirina terorîstên navneteweyî hene. Nûnerê Taybet ê Amerîkayê yê ji bo Sûriyê, Tom Barrack, berê dabû zanîn ku rêveberiya Şera "gavên rast diavêje."
Helwesta rêveberiya Trump û têkiliyên bi Îsraîlê re
Çavkaniyên siyasî destnîşan dikin ku rêveberiya niha ya Serok Donald Trump ji serdema xwe ya yekem zêdetir bi biryar e ku hebûna xwe ya leşkerî li Sûriyê biparêze. Derbarê têkiliyên di navbera Şam û Tel Avîvê de, karbidestekî din ê Amerîkayî got ku aştiya di navbera her du welatan de niha weke "xeyalekê" ye, lê wî piştrast kir ku hin danûstandinên nefermî yên ewlehiyê li ser herêma sînorî hene.
Di dawiyê de, karbidestê Amerîkayî îdiayên ku digotin Amerîka plan dike navendeke leşkerî ya nû li nêzîkî Şamê ava bike, weke "bê bingeh" bi nav kir û got ku mîsyonên wan ên heyî hewceyî pêngaveke wisa nakin.
Ev nivîs 41 car hatiye xwendin.
