Biryara boykotê ya CHPê siyaseta Tirkiyê aloztir kir

PeyamaKurd - Girtina Serokê Şaredariya Bajarê Mezin a Stenbolê Ekrem İmamoğlu, di siyaseta Tirkiyeyê de şikestinek mezin bi xwe re anî ku cara yekem piştî 23 salên deshilatdariya AK Partiyê bandoreke ewqas mezin li ser civaka Tirkiyê dike.

Piştî xwepêşandanên nerazîbûnê yên bi pêşengiya Partiya Komarî ya Gel (CHP) ku xwendekarên zanîngehan piştevaniyeke mezin danê, CHPê biryar da ku kompaniyên nêzî deshilatdariyê wekî protesto boykot bike û nav û markeyên hejmarek ji wan ku piraniya wan saziyên medya û ragihandinê bûn eşkere kirin.

CHPê biryara girtina Îmamoglu û hevalên wî ku bi hinceta doza gendeliyê hatine girtin, wekî siyasîkirina hiqûqê dinirxîne, bi tundî bertek nîşan dide.

Piştî ku hejmarek xwendekaran li ser medya civakî kampanyaya boykoto giştî seranserê Tirkiyê ragihandin CHPê jî piştgirî da wan û ji bo 2yê Nîsanê li seranserê welat bang kir ku boykot bê kirin û wê rojê ti tiştek ne bi pere ne jî bi kartên bankeyan neyê kirîn. Ev yek bû sedema berteka deshilata Tirkiyê û wezîrên hikûmetê rexneyên tund li vê helwesta CHPê girtin û ji welatiyan xwestin guh nedin boykotê.

Pêşî Serokê CHPê boykot da destpêkirin

Serokê partiyê Özgür Özel piştî operasyonên ser Şaredariya Stenbolê gotibû ku İmamoglu nûnertiya îradeya gel dike û dadgeh bûye amrazek siyasî, û civak divê bi riyên demokratîk li dijî vê neheqiyê bertekê nîşan bide. CHPê biryara boykota aborî ya berfireh da ku ji hilberînên bingehîn dest pê dike û bang li welatiyên ku di vê pêvajoyê de piştgiriyê bikin kir.

Li gorî CHPê, girtina İmamoglu beşek ji plana desthilatdariyê ye ku bajarên mezin ên ku bi hilbijartinan winda kirine, dîsa bi dest bixe. Navên pêşeng ên partiyê dibêjin ku biryara dadgehê bi zextên siyasî hatiye girtin û li Tirkiyeyê hiqûq bi tevahî ketiye bin kontrola desthilatdariyê. Li Stenbolê û bajarên mezin ên din gel ji bo piştgiriya İmamoglu derketiye kolanan, şaredariyên CHPê jî bang dikin ku li dijî bêhiqûqiyê li ber xwe bidin.

Deshilatdarî boykotê wekî provokasyon dibîne

Aliyê desthilatdariya AK Partî û MHPê boykota CHPê wek "provokasyon" bi nav dike. Serokomar Erdogan û rayedarên hikûmetê dibêjin ku her kes divê rêzê li biryara dadgehê bigire û dibêjin ku opozîsyon aloziyê zêde dike.

Herwiha dezgehên medyayê yên nêzî AK Partiyê îdia dikin ku boykot ji bo têkbirina aboriya netewî ye û bang li welatiyên dikin ku beşdarî çalakiyên wisa nebin.

Lê CHP jî dibêje ku zirara rastîn a aborî ji ber bêhiqûqî û nêrîna rêvebiriya keyfî ye.

Li gorî nirxandinên şîrovekaran girtina Îmamoglu wek geşedaneke ku dikare hevsengiya siyasî ya Tirkiyeyê biguherîne tê dîtin, ji ber ku Îmamoglu weke namzedê CHPê yê Serokomariyê yê reqîbê Erdogan hatiye diyarkirin.

Opozîsyon boykotê wekî amûreke têkoşîna demokrasî û edaletê şîrove dike, deshilatdarî jî wekî êrîşeke dijî aboriya netewî ya Tirkiyê dinirxîne ku ev jî bûye sedema aloziyê di siyaseta Tirkiyê de.

Ev nivîs 63 car hatiye xwendin.