Hêzên Kurd banga yekîtî û rêveberiya hevbeş li Azeriyan kir

PeyamaKurd - Hevpeymaniya Hêzên Siyasî yên Kurdistana Îranê di daxuyaniyekê de ku di 14ê Adara 2026an de hat weşandin, bang li hemû neteweyên bindest û azadîxwazên Îranê bi taybet jî gelê Azerbaycana Îranê kir ku ji bo hilweşandina rejîmê û avakirina paşerojeke demokratîk, eniya xwe ya têkoşînê xurt bikin.

Bingeha Îraneke demokratîk û piralî

Di daxuyaniyê de hat destnîşankirin ku paşerojeke aram ji bo Îranê tenê bi rêya stajêkirina pergaleke demokratîk pêkan e. Hevpeymaniyê diyar kir ku divê ev pergal li ser bingeha naskirina mafên neteweyî, dadperwerî, wekhevî û misogerkirina azadiyên bingehîn ên welatiyan bê avakirin. Herwiha hat ragihandin ku Hevpeymanî amade ye bi hemû hêzên siyasî û sivîl ên demokratîxwaz re ji bo avakirina Îraneke azad û piralî hevkarî bike.

Peyama hevkariyê ji bo gelê Azerî

Hevpeymaniya Hêzên Siyasî yên Kurdistana Îranê di peyama xwe de bi taybetî bang li gelê Azerî kir û bal kişand ser jiyana hevbeş a sedsalan a Kurd û Azeriyan. Hevpeymaniyê destnîşan kir ku di herêmên têkel de divê modela "rêveberiya hevbeş" a herêmî bê pêşxistin ku daxwazên gel û pêkhateya demografîk li ber çav bigre. Hat gotin ku aramî û ewlehiya herêmê di bin siya wekheviya mafên siyasî, çandî û zimanî yên her du gelan de pêkan e.

Pabendbûna bi 'Peymana Dostaniyê'

Di daxuyaniyê de careke din tekezî li ser pêwendiyên dîrokî yên di navbera gelê Kurd û Azerî de hat kirin. Hevpeymaniyê pabendbûna xwe bi naveroka "Peymana Dostaniyê" ya di navbera Komara Kurdistan û Hikûmeta Neteweyî ya Azerbaycanê de nû kir û ew peyman wekî nexşerêya hevahengî û hevkariya tevgerên demokratîk ên her du aliyan pênase kir.

Têkiliyên herêmî û cîrantî

Hevpeymaniya Hêzên Siyasî yên Kurdistana Îranê di çarçoveya têkiliyên bi welatên cîran re jî peyameke aştiyane da. Di daxuyaniyê de hat gotin ku ew alîgirê prensîbên jiyana aştiyane, cîrantiya baş û rêzgirtina li berjewendiyên rewa yên dualî ne. Hat destnîşankirin ku aramiya herêmî tenê bi rêya diyalog û hevkariya di navbera gel û dewletan de xurt dibe.