HKN Energy û Şirketa Petrolê ya Bakur ji bo bipêşxistina Petrola Hemrînê, peymanek îmze kir

PeyamaKurd – Wezareta Petrolê ya Iraqê ragihand ku Şirketa Petrolê ya Amerîkî HKN Energy û Şirketa Petrolê ya Bakur (NOC) peymanek ji bo bipêşxistina zeviya petrolê ya Hemrînê îmze kir.

Armanca peymanê zêdekirina hilberîna rojane ya zeviyê petrolê ye heta 60,000 bermîlan û bikaranîna gaza hevkar ji bo santralên elektrîkê ye.

Wezîrê Petrolê Heyan Ebdulxenî diyar kir ku zeviya Hemrînê, ku niha rojane 20,000–25,000 bermîl petrol hildiberîne, yek ji zeviyên herî berhemdar e. Wî tekez kir ku armanc gihandina hilberînê heta 60,000 bermîlan û hilberandina 45–50 milyon lingên sêcar gaza xwezayî ye, ku dê ji bo santralên elektrîkê were bikaranîn.

Steven Fagin, Berpirsê Karûbarên Balyozxaneya Amerîkayê li Bexdayê, got: "Em dixwazin têkiliyên bazirganî bi Iraqê re xurtir bikin." Matthew Zais, Cîgirê Serokê HKN Energy jî ragihand ku ew ê zeviyê bi tevahî kapasîteyê bi pêş bixin, bi bikaranîna %80 hêza kar a Iraqî û piştgiriya civakên herêmî.

HKN Energy li Herêma Kurdistanê jî çalak e, bi taybetî li zeviya Sersingê ya li Dihokê, ku xwedî kapasîteya 30,000 bermîl rojane ye. Lê belê, îro saet 7:00ê sibê êrîşek li ser zeviya Sersingê çêbû, û HKNê ragihand ku hilberîn li wir rawestiyaye. Zeviya Sersingê xwedî rezervên texmînkirî yên 70 milyon bermîl e.

HKN di heman demê de endameke sereke yê Yekîtiya Pîşesaziya Petrolê ya Kurdistanê (APIKUR) e.

 

 

 

Ev nivîs 86 car hatiye xwendin.