Sefîn Dizayî: Di du mehên dawî de zêdetirî 850 êrîş li ser Herêma Kurdistanê hatine kirin

PeyamaKurd - Berpirsê Ofîsa Peywendiyên Derve ya Herêma Kurdistanê Sefîn Dizayî ragihand ku tevî Herêm nabe parçeyek ji şerên li herêmê, di du mehên dawî de zêdetirî 850 mûşek û dironan li xala cuda yên Kurdistanê ketine. Dizayî diyar kir ku wan nerazîbûnên xwe yên fermî gihandine konsolxaneyên Îranê. Di berdewamiya axaftina xwe de, Dizayî serdana Serokwezîr Mesrûr Barzanî ya ji bo Tirkiyeyê wekî pêngaveke "pir girîng" ji bo aramiyê pênase kir. Hat eşkere kirin ku di hevdîtina bi Serokomar Erdogan re, mijara sereke dubare hinardekirina petrola Herêmê û Kerkûkê bi rêya bendera Ceyhanê bûye.

Astengiyên Bexdayê û xebatên navneteweyî

Sefîn Dizayî rexne li helwesta hinek aliyên di nav hikûmeta federal a Iraqê de girt ku mîna "welatekî biyanî" nêzî Herêma Kurdistanê dibin û bacên giran li ser bazirganiyê datînin. Dizayî derbarê sîstema gumrikê ya bi navê ASYCUDA de jî got ku ew li dijî şefafiyetê nîn in, lê ferzkirina vê sîstemê ya bi lez û bez dibe sedema giranbûna bihayê kelûpelan li ser welatiyan. Ji bo parastina statûya destûrî ya Herêmê û gihandina dengê gelê Kurd, Dizayî bal kişand ser serdanên xwe yên dawî yên ji bo welatên Ewropayê mîna Fransa, Belçîka, Awistriya, Brîtanya û Hollandayê.