پەیامی کورد   ...   شەمخانی : ئێران پێشنیارێکی نوێ بۆ ئەمریکا دادەڕێژێت

ڕاوێژکاری سیاسی ڕابەری باڵای ئینقلابی ئیسلامی ووتی: ئەو پێشنیازەی کە ئەمریکا بۆ ڕێککەوتنی ئەتۆمی پێشکەشی کردووە "ناتەکنیکی و ناپڕۆفیشناڵە" و ئێران خەریکی داڕشتنی پێشنیارێکی نوێیە.
بە پێی ڕاپۆرتێک ، عەلی شەمخانی ڕاوێژکاری سیاسی ڕابەری باڵای ئینقلابی ئیسلامی لە چاوپێکەوتنێکدا لەگەڵ تۆڕی مەیادین جەختی لەوە کردەوە کە ئەو پێشنیازەی کە ئەمریکا بۆ ڕێککەوتنی ئەتۆمی پێشکەشی کردووە "ناتەکنیکی و ناپڕۆفیشناڵە" و ئێران خەریکی داڕشتنی پێشنیارێکی نوێیە.

ناوبراو بە ئاماژەدان بەوەی کە ئێران هەرگیز دەستبەرداری مافە سروشتییەکانی نابێت، ووتی: پێشنیازی ئەمریکا تەنانەت پرسی هەڵگرتنی گەمارۆوەکانیش ناخاتە ڕوو، لە کاتێکدا ئەم پرسە پرەنسیپێکی بنەڕەتییە بۆ تاران.

شەمخانی هۆشداری دا: ئێران ڕێگە نادات ئەمریکا ئامانجەکانی هەڵوەشاندنەوەی پرۆگرامی ئەتۆمی و گەیاندنی ئاستی پیتاندنی یۆرانیۆم بۆ سفر بگات.

ناوبراو لە کۆتایی دا ئاماژەی بەوە کرد کە هەڵوێستی ئەمریکا سەبارەت بە دانووستانی ئەتۆمی لەگەڵ ئێران لە سەردەمی ئۆبامادا گۆڕانکارییەکی ئەوتۆی بەسەردا نەهاتووە.