میسر بەرەو هەڵسەنگاندن و هەموارکردنەوەی پەیمانی ئاشتی لەگەڵ ئیسرائیل هەنگاو دەنێت

بەپێی ئەو ڕاپۆرتە ئیسرائیلییانەی کە پلاتفۆرمی نیتزاڤ ئاماژەی پێکردووە، میسر بەرەو هەڵسەنگاندنەوە و ئەگەری هەموارکردنەوەی پەیماننامەی ئاشتی ساڵی ١٩٧٩ لەگەڵ ئیسرائیل هەنگاو دەنێت، ئەمەش بە لەبەرچاوگرتنی گۆڕانکارییە خێراکانی جیۆپۆلەتیکی ناوچەکە. نیتزاڤ ئاماژە بەوە دەکات کە ئەم هەنگاوە هاوکاتە لەگەڵ باسکردنی ئەگەری سەردانێکی عەبدولفەتاح سیسی، سەرۆکی میسر بۆ واشنتۆن، هەرچەندە سەرچاوە ئاگادارەکان ڕەتیدەکەنەوە هیچ نیازێکیان هەبێت بۆ دیدار لەگەڵ بنیامین ناتانیاهۆ، سەرۆکوەزیرانی ئیسرائیل لەم سەردانە پێشبینیکراوەدا.

پلاتفۆرمەکە ئاماژەی بەوە کردووە کە ڕاپۆرتە هەواڵگرییەکانی ئیسرائیل لەم دواییانەدا دەستنیشانیان کردووە کە سوپای میسر کە سیستەمی بەرگری ئاسمانی پێشکەوتووی لە نیمچە دوورگەی سینا جێگیر کردووە، لەنێویاندا سیستەمی HQ-9Bی چینی. ئەمەش بە "پێشێلکارییەکی ڕوون" لە بڕگەکانی پەیمانی ئاشتی دادەنرێت، کە سنووردارکردنی توند بەسەر قەبارە و جۆری جێگیرکردنی سەربازی میسر لە ناوچەکەدا دەسەپێنێت.

لە بەرامبەردا قاهیرە بە ئاماژەدان بە پێویستی بەهێزکردنی توانا بەرگرییەکانی لە باکووری سینا و پاراستنی ئاسمانی وڵاتەکەی، پاساو بۆ ئەم ڕێوشوێنانە دەهێنێتەوە، تەنانەت ئەگەر بەپێی گێڕانەوەی ئیسرائیل ئەمە پێچەوانەی ئەو پابەندبوونانە بێت کە لە ڕێککەوتنەکەدا هاتووە.

ناتسیڤ جەختی لەوە کردەوە کە ئەم پێشهاتە ڕووداوێکی گۆشەگیر نییە، بەڵکو لوتکەی پرۆسەیەکی درێژخایەنە کە لەم ماوەیەدا ئامادەبوونی سەربازی میسر بەهێزتر بووە بەبێ وەڵامدانەوەی توندی ئیسرائیل یان فشارێکی جددی ئەمریکا بۆ دڵنیابوون لە پابەندبوون بە مەرجەکانی ڕێککەوتنەکە. ڕاپۆرتەکە ئاماژەی بەوە کردووە کە سەرقاڵبوونی سەرکردایەتی ئیسرائیل بە مانەوەی سیاسی کەسی ڕێگری دەکات لە پەیوەندییەکی جددی لەگەڵ تەحەددای ستراتیژی کە دەتوانێت کاریگەری لەسەر ئاسایشی نیشتمانی ئیسرائیل لە درێژخایەندا هەبێت.

پلاتفۆرمەکە ڕاپۆرتەکەی بە هۆشدارییەکی ڕاستەوخۆ بۆ بڕیاردەرانی ئیسرائیل کۆتایی پێهێنا و ئاماژەی بەوەدا کە هەر ڕێککەوتنێک بۆ هەموارکردنەوەی پەیماننامەی ئاشتی دەتوانێت دەرگا بەڕووی داواکارییەکانی دواتری میسردا بکاتەوە بۆ گۆڕانکاری زیاتر، لەکاتێکدا ئەوەی بە پێشێلکردنی ڕێککەوتنەکە وەسفی کردووە بەردەوامە.